KAMPANYA sa information dissemination ang gilusad sa Dakbayan sa Talisay pinaagi sa pag apod-apod sa pamphlets ug tarpaulins sa mga barangay aron magiyahan ang mga tawo kon nganong kinahanglan nga mosubay sa health protocol sa Department of Health.
Tumong niini aron mas mahatagan og kaalam ang mga tawo kabahin sa coronavirus disease (Covid-19) sa nasod.
Ang maong paagi gisugdan ni Talisay City Mayor Gerald Anthony "Samsam" Gullas Jr. sa duha ka bug-at nga mga impormasyon nga gipatik sa mga papel ug tarpaulins.
Kini mao ang mas sayo nga pag detect sa simtomas sa sakit ug health protocol sama sa kanunay nga pagsul-ob ug facemask kon mogawas sa balay, pag-obserbar og physical distancing, paghinlo sa panglawas ug pag-disinfect sa kaugalingon ug palibot.
Niining paagiha, mas mamenosan ang risgo sa pagtakboy sa kagaw.
Matod ni Gullas nga mitabang usab ang tricycle drivers sa dakbayan pinaagi sa pagpamutang sa tarpaulin atubangan sa ilang mga tricycle aron dayag kining makita sa mga tawo sa mga barangay nga ilang maagian.
"Let me be clear and this is what we have to info disseminate, Covid is very dangerous and it is here. Take this virus seriously", matod ni Gullas.
"As cases continue to rise not only in Talisay, I ask all of you to not take this virus lightly. There is nothing light about this virus. This is a very dangerous virus," dugang ni Gullas.
Mihangyo si Gullas nga kon may gibati nga simtomas sa Covid, kinahanglan nga modangop dayon sa barangay o duol nga hospital aron masusi ug mapaubos dayon sa saktong paagi sa pagtambal.
"We all have loved ones fighting for their lives because of this virus. We have lost friends and even families because of this virus. Please don’t wait until it hits close to home to be vigilant about this," hangyo ni Gullas.
Sa 44 ka mga lungsod ug unom ka mga syudad sa Probinsya sa Sugbo, nag-una gihapon ang dakbayan sa Talisay sa may labing taas nga kaso sa Covid-19.
Base sa datos sa Hulyo 7, 2020, moabot sa 379 ang natala nga positibong kaso sa syudad.
Sa maong datos 208 ang aktibo, hinuon may 146 na nga naka recover, apan 49 na ang nangamatay.(ANV)