SILOTAN na ang Dabawenyo kinsa mapakyas sa pagsul-ob og face mask sa pampublikong lugar.
Kini human nga napasar sa Konseho ang ordinansa nga nagmando nga magsul-ob og face mask sa tanang panahon sa mga pampublikong lugar atol sa community quarantine o hangtud ang state of public health emergency malibkas.
Gisulti ni Konsehala Myrna Dalodo-Ortiz nga maoy nagsugyot sa ordinansa atol sa paghinabi sa SunStar Davao pinaagi sa telepono nga ang "The Mandatory Face Ordinance" nagtumong sa pagpatuman sa mas istriktong mga sumbanan sa pagsul-ob og face mask nga gi-require sa lokal nga panggamhanan samtang ang tibuok siyudad naa pa ubos sa community quarantine tungod sa coronavirus disease 2019 (Covid-19) pandemic.
Ubos sa ordinansa, mga mosupak multahan og P500 sa unang higayon, P2,000 alang sa ikaduha, ug P5,000 multa o usa ka bulan nga pagkapriso o sa duha sa ikatulong paglapas.
Gibutyag ni Dalodo-Ortiz nga sukad nga giimposar ang quarantine sa siyudad pila na ka bulan ang milabay, daghang mga indibiduwal nasiplatan nga wala magtuman sa pagsul-ob gyud og face mask sa pampublikong lugar.
Kini bisan pa og nahinuod ubos sa memorandum circular sa Department of the Interior and Local Government, ug sa giisyu nga Executive Order 20 ug 33-A sa lokal nga panggamhanan.
"We find the need to enforce this. Di ta makaingon nga mandatory ang wearing niini kung ang tawo dili gyud mutuo. Ang nakita nato is that mapatuman nato kini kung magpatuman kita og penalties sa mga violator," tataw ni Dalodo-Ortiz.
Samtang gisulti sab sa konsehala nga ang ordinansa magsilot sab niadtong di magtarong og sul-ob sa ilang mga face mask, ug migamit sa sayop nga matang sa face mask.
Nagpahimangno sab ang ordinansa sa mga establisemento nga iimposar ang "no face mask, no entry" sa ilang mga dapit.
Mga minor nga masakpan sa gawas ug wala magsul-ob og face masks, manubag ang ilang mga ginikanan.
Giduso na ni Dalodo-Ortiz ang giaprobahan nga ordinansa ngadto sa buhatan sa Mayor. Moepekto ang ordinansa human ang 15 ka adlaw human malagdaan sa mayor, ug mapublikar sa mga lokal nga mantalaan, ug sa social media account.
Dugang sa konsehala nga tumong sab niini mao nga makatabang aron nga makunhoran ang pagkuyanap sa Covid-19, kon diin ang face mask, sumala sa mga opisyal sa panglawas, maoy epektibo nga gamit sa pagbatok sa transmisyon sa kagaw nga madala sa mga pinisik gikan sa pag-ubo ug pag-atsing.
Base sa datus sa Davao City Police Office niadtong Hulyo 8, 44 ka mga indibiduwal ang nadakpan tungod kay wa magsul-ob og face mask sukad nga napatuman ang community quarantine sa siyudad.