DEAR Noy Kulas,
Nagtrabaho ko sa usa ka company sa Cebu City, pero taga Lapu-Lapu City ko. Sukad nag-quarantine na, wa na ko makatrabaho kay ang among company di man essential. Naa gihapon mi income kay nag work from home ming mahimo nga mag-online lang.
Sa among company, akong nahimong boyfriend ang usa ka supervisor nga engaged na sa iyang GF nga naa sa abroad. Magminyo na unta sila karong tuiga pero tungod sa Covid basin ma-postpone na next year.
Bisan nakahibawo ko sa ilang relationship, ako gihapon gipansin ang supervisor kay na in love na man ko niya. Anyway, single pa bitaw siya bisan engaged na sila sa iyang GF. But ang problema karon kay nasakpan siya sa iyang GF nga naa mi relasyon. Pwerte nilang awaya ug gitawgan ko sa babaye. Akong nahibaw-an five years na diay sila unya ni-abroad siya para nilang duha.
Naka-realize ko sa akong sayop mao to akong gibuwagan ang supervisor, pero di siya mosugot. Nibahad na siya nga maghikog. Bahala na kuno nga magkabuwag sila sa iyang GF basta magbuwag mi. Ako na siyang gipasabot pero di maminaw. Unsa kahay akong buhaton? Naluoy ko niya but naluoy man pud ko sa iyang GF. Please tambagi ko.
RON
Ron,
Kon sa panggobyerno pa na, kinahanglan nimo ang political will. Kana bang kinahanglan nga mo-decide ka nga hugtanay. Kon sa imong tan-aw di na maayo nga makisawsaw sa ilang relasyon, buwagi ang imong boyfriend. Di baya sab maayo nga naa ka sa ilang relasyon karon kay tiaw mo na, nagsakripisyo ang babaye nga mahiadto sa layo alang nilang duha. Bisan tingali kon ikaw ang naa sa habig sa babaye, haskang sakita na kaha nga mapornada ang tanang mga plano.
Tanang tawo, kon ingon ana na lang nga kahadlukan kay maghikog kon maputol ang relasyon, kadaghan na sa nangabilanggo sa relasyon. Iyaha na kanang problema kon unsaon niya pag cope sa inyong panagbuwag. Kon duna may problema silang duha, i-resolve nila. Don’t be part of it. Mao lagi na, wa na lang unta ka nisud sa ingon niana nga relasyon kay wan a unta sab ka masakiti ug makapasakit. Busa, karon pa lang, putla na kana.
NOY KULAS