ANAK ni anhing Cebu City Councilor Antonio Cuenco pulihan sa iyang pwesto sa konseho sa iyang anak nga si James Anthony Cuenco.
Mao kini ang gipahibalo sa Barug-PDP Laban, partido sa pulitika diin nasakop ang namatay ug usab ang iyang anak nga si James. Kini ang nahukman sa partido niadtong Hulyo 8, 2020 ug gipahibalo sa media pinaagi sa virtual press conference.
Apan sa pagkakaron, ang Office of the President moaprobar pa sa pagkatudlo sa batan-ong Cuenco isip bag-ong konsehal sa siyudad puli sa iyang amahan.
Ang Barug-PDP Laban nagpili sa duha nga mopuli sa namatay nga opisyal nga mao sila si James ug kanhi Konsehal Jocelyn Pesquera, sumala ni Cebu City Vice Mayor Michael Rama.
Apan si Pesquera nisibog alang sa paghatag sa kahigayonan ni James, ang anak sa nitaliwan nga opisyal.
Maisip nga mao kini ang ikatulong termino ni Jame nga nahimong konsehal sa dakbayan apan, sumala sa batan-ong Cuemnco, tungod gitudlo lang siya busa dili kini maapil sa ihap.
Ang batan-ong Cuenco nagsilbing konsehal sa siyudad gikan sa 2013 ngadto sa 2016 ug gikan sa 2016 ngadro sa 2019. Wala siya mokandidato sa May 2019 elections. Ang batan-ong Cuenco na-dismiss panahon sa iyang termino sa 2017.
Sumala sa taho sa SunStar Cebu, ang Office of the Ombudsman nihukom nga si Cuenco “guilty of serious dishonesty and grave misconduct for using falsified documents in the disbursement of public fund..”
Kini dunay kalambigitan sa pagpatuman sa P3.3-million medicine assistance program nga gikuha sa Priority Development Assistance Fund (PDAF) sa iyang amahan nga kanhi nahimong kongresista.
Siya nakabalik human ang Sandiganbayan’s s First Division nibasura sa mga kaso batok kanoyua niadtong 2018.
Ang batan-ong Cuenco nagpasalamat sa iyang mga kauban sa partido sa pagpili kaniya nga mohulip sa iyang amahan sa konseho.
“I would like to thank my political party for choosing me to replace the position vacated by my late father,” matod sa batan-ong Cuenco. Siya nihangyo kang Pesquera sa suporta labi na sa pag-umol og mga bag-ong ordinansa, diin ang naulahi positibong nitubag.
Si Rama nagkanayon nga pipila ka adlaw ug daghang konsultasyon ang gihimo sa wala pa sila mohimo sa maong hukom.
Si Cebu City Mayor Edgardo Labella nagkanayon nga lisod ang pagpili human ang duha ka mga opisyal pareho nga kuwalipikado sa posisyon.
Ang Cebu City Council mohimo sa ilang inaugural session karong Hulyo 15, Miyerkules. (JJL)