PRESCIL I. CANETE
Cordova, Cebu
GIKAN pa si David sa iyang opisina. Nag-alagad siya isip klerk sa usa pribadong buhatan dinhi sa dakbayan sa Sugbo. Ambungan si David, ulitawo pa sa panuigon nga kawhaan ug lima. Sa iyang paggula sa buhatan sagol dagan ang iyang mga lakang tungod sa nagpadayon nga ulan dala sa bagyong Ursola. Nagbarog si David sa balisbisan sa karaang Cinerama sa dalan Colon. Nagpaabot siya sa ‘stop signal’ sa trapiko kay nagpadayon pa man ang ‘go signal.’ Ang ulan walay puas, nagbaha ang kadalanan kay miawas ang tubig sa mga kanal ug estero.
Midali pagtabok si David sa atbang dihang pula na ang signal sa trapiko para sa mga sakyanan. Namidpid siya sa aseras tungod sa karaang Manila Bank, nagpaabot og sakyanan paingon sa Pier 3 diin adto siya mosakay sa ‘ferryboat’ paingon sa Lapu-Lapu City. Taga Lapu-Lapu si David.
“Plasa... Pier 1, 2, 3!” singgit sa konduktor nga nagmasyar sa ruta.
Misakay dayon si David. Mihugong pagdagan ang dyip dihang nakalingkod na siya. Unya didto sa unahan miurong kini sa ‘jeepney stop’ kay may babayeng mipara ug misakay. Nagbitbit siyag pungpong sa mga bulak nga rosas. Maanyag ang babaye ug milingkod sa atbang ni David. Nagsul-ob kinig puti nga T-shirt ug ‘stretchable jeans’ nga maong.
“Nindot lagi ang dal among buwak, Miss,” ni David nga mipahiyom sa babaye.
“Salamat,’ tubag sa babaye nga mipahiyom sab.
“Pero, mas gwapa gyud ang nagdala sa buwak,” ni David.
“Ikaw ang nagsulti.”
“Diin man na nimo mapalit, Miss?”
“Sa Freedom Park, atbang sa USJ-R.”
“Di ba sa Busay man gikan ang daghang klase sa buwak, no?”
“Oo, sa luyong bungtod sa siyudad.”
“Mosugot ka kon akong paliton kanang imong mga buwak?” tiaw ni David.
“Dili nako ibaligya,” mikatawa ang babaye. Ang mga pasahero igo lang mitan-aw ug naminaw nilang duha.
Mihunong ang dyip nga ilang gisakyan. Pier 3 na diay. Sama kang David sa Lapu-Lapu sab diay mopauli ang babaye. Nag-ubay silang nanglakaw paingon sa ‘ferryboat.’
“Miss, unsa diay imong ngan? Ako si David,” paila niya.
“Jessa ko,” tug-an sa babaye.
“Asa nimo dad-a kanang buwak?” usisa ni David.
“Duna koy halaran niini,” sa babaye nga milingi kang David.
“Hala, tomboy ka?”
“Di, uy! Simbako ka!” matod sa babaye.
“Aw, kon mao na, hinatag na sa imong uyab,” ni David nga buot mamingwit sa tinuod nga hinungdan.
Pagdunggo sa ‘ferryboat’ sa pantalan sa Lapu-Lapu City paspas nga milakaw si Jessa nga way lingi-lingi. Gisundan siya sa panan-aw ni David. Buot niining pamatud-an kon unsa katinuod ang giingon sa babaye. Kinsa kaha ang halaran niini sa mga buwak? Pagka suwerte sa lalake kon kinsa man kini! Milabay ang pipila ka minutos. May miturok nga pagduda sa hunahuna ni David. Miagpas siya kang Jessa. Wa diay mamakak si Jessa. Dili kini tomboy. Dili sab hinatag sa uyab ang gidala niyang mga buwak. Nakita ni David nga misulod si Jessa sa simbahan sa Birhen sa Regla.
(KATAPOSAN)