HAYAN di unta sila masakpan sa kapulisan sa checkpoint kon wa pa maratol ang usa kanila nga maoy giingong nagdala og illegal drugs.
Apan ang una nilang sipyat sa pagkakuha sa atensyon sa kapulisan kanila mao ang wa paghunong sa checkpoint, nilahos lang kini sa unang pag-agi.
Ang upat ka mga tawo, duha ka mga lalake ug duha ka mga babaye, luwan sa usa ka awto dihang niagi sa usa ka quarantine control checkpoint sa alas 2 sa Miyerkules sa kaadlawon sa Barangay Punta Princesa, Dakbayan sa Sugbo.
Usa ra hinuon kanila ang nadakpan sa pagdala og illegal drugs samtang ang kaubang tulo gidakop sa paglapas sa quarantine protocol.
Ang checkpoint gidumala nila ni Police Lieutenant Amory Napoles ug Police Lietenant Jessie Tañola sa Crisis Response Batallion sa Police Regional Office 7.
Giila ni Napoles ang mga dinakpan sa paglapas sa quarantine protocol nga nalatid sa executive order ni Mayor Edgardo Labella nga sila si Audrey Leight Tantog, 23; Lawrence Farley Sanchez, 28; ug Micky Mae Margallo, 22, pulos mga lumolupyo sa Dakbayan sa Talisay
Samtang ang ig-agaw ni Tantog nga si Jose Faustino ,23, kasamtangang lumolupyo sa Teresita Village, Barangay Tisa, ning siyudad gidakop sa paghupot og illegal nga drugas.
Si Faustino nakuhaan og duha ka mga pakete sa shabu nga iyang gisuwayan sa paglabay, apan nabantayan sa usa sa mga pulis sa checkpoint.
Dugang ni Napoles nga ang upat giingong kusog ang padagan ug milahos lang sa checkpoint mga pasado alas 11 sa Martes sa gabii.
Pipila ka mga oras ang nakalabay, niagi na usab unta kini, apan wa na makalusot, ila kining gipara.
Si Faustino giingong naratol, gilabay ang gituohang shabu, apan nakit-an sa usa sa mga pulis.
Ang upat, sa pagsuwat ning taho, gitanggong sa detention cell sa Barangay Punta Princesa samtang giandam ang kasong ipasaka batok kanila. (BBT)