Nalzaro: I-swab test pod ang patay

DILI lang siguro buhi ang angay ipa-swab test kon dili apil usab ang patay. Mao ni ang gitawag sa Ininglis nga post mortem Covid test. Ngano man? Dilikado gihapon nga manakod ang patay kon kompirmadong Covid-19 ang namatyan kay dili man mamatay ang virus bisan kon patay na ang natakbuyan. Mao bitaw na ang rason kon nganong manduan dayon ang tagtungod nga ipa-cremate.

Angay usab nga i-swab test gyud ang gidudahang namatay gumikan sa Covid-19 aron maprotektahan ang mga tagtungod, doktor, taga punerarya, mga kabanay ug higala sa minatay. Siyempre, kon wala kita masayod nga Covid ang namatyan, kompiyansa ra kita kaayo.

Una, ang mga doktor mokompiyansa. Ang mga taga punerarya mao pod. Mohikap sila sa minatay labi pa kon embalsamaron. Unya, ang minatay lamayan o bilaran pa. Apil sa atong tradisyon mao ang paglamay o pagbilar sa atong mga minatay aron makatambong ang mga kabanay nga atoa sa ubang lugar. Daghan pang mga silingan ug higala ang mobilar kay pangadye ug magsugal.

Nahitabo na bitaw na sa Talisay City nga adunay namatay nga wala pa mogawas ang resulta sa swab test. Gibilaran ang minatay kay nagtuo nga namatay kini sa laing sakit. Apan pag-abot sa swab result, sus, positibo man diay. Aw, gipalubong dayon. Pero nakapanakod na sa mga kabanay ug sa mga mibilar. Mao nga gikinahanglan nga ipa-post mortem Covid test ang minatay.

SEMENTERYO

Dili lang diay ospital ang napuno karon sa Covid patients, kon dili mga sementeryo usab. Kini gumikan sa daghan na kaayong nangamatay. Ang ubang mga namatay gumikan sa Covid-19 nagtuo ko nga wala na gani marehistro sa City Health Department. Mao nga ang Kagamhanan sa Dakbayan sa Cebu ug Mandaue nangita og lote para himuong sementeryo. Bawal magkasakit ug mamatay karong panahuna. (bobbygnalzaro@gmail.com)

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph