ANG pagserbisyo sa publiko isip usa ka frontliner mao ang tahas karon ni Master Ekin Caniga isip konsehal sa Barangay Day-As, Dakbayan sa Sugbo taliwala sa pandemya.
Si Caniga, usa ka inila nga MMA personality ug tag-iya sa Yaw-Yan Ardigma Cebu gym, nagkanayon nga tanan sa iyang oras karon naka focus sa serbisyo publiko kay wa pa tugoti pagbalik ang combat sports.
“More challenging as frontliner / Konsehal sa Barangay kay among tahas is to protect and assure the safety sa among constituents para dili gyud modaghan ang Covid-19 positive cases diri sa among barangay,” matod ni Caniga, kinsa gitahasan mudomala sa committee on peace and order.
Taga-adlaw si Caniga ug ang ilang team nag-roving sa ilang barangay.
“Sige mig pamadlong aning maag gawas-gawas walay mask, mga gahi og ulo, usahay labad pud ang ulo namo sa council kung nay mo positive sa area. Amo dayon pangitaon og e contact trace. Maayo gani among barangay dili kayo daghan og positive cases,” dugang niya.
Matod niya dako pud ang problema ang giatubang karon sa mixed martial arts scene tungod kini direkta gyud nga naapektohan sa Covid-19 pandemic kay ang sports nahunong man. Ang mga coaches ug atleta kalit lang nawad-an og panginabuhian tungod sa pandemya.
“Dako og impact sa combat sports, dili pa man mi maka-operate sa gym. Nag propose na ang GAB (Games and Amusements Board) didto sa IATF (Inter-Agency Task Force on Emerging Infectious Diseases) nga maka-open na ang mga gym sa mga lugar na dili na ECQ,” saysay ni Caniga.
Wala pa gitugot ang practice sa combat sports sa mga lugar nga under general community ug modified general quarantines. Aduna lang pipila ka sports ang gitugotan.
“Naa man tay procedures nga di magka contact ang athletes or students during training sa fitness gym. Pero wala paman gitugotan,” matod ni Caniga.
Si Caniga miingon nga iyang source of income karon mao ang iyang sweldo sa barangay, samtang dili tanan fighters ug coaches niya adunay trabaho karon.
Problema pud karon sa mga tag-iya og fitness gym ang abangan.
“Labad akong ulo kay almost four months na ako abangan sa building. Niya sirado ra ba mi. Di man mosugot ang tag-iya sa building nga dili moabang. Naa nay memo sa amoa amo pa pakitaan ang tag-iya basin mosugot if mangayo mi og discount,” sigon niya.
Si Caniga nag-promote og MMA fights dinhi sa Sugbo, aduna siyay mga fighters nga gidumala ug mga studyantenga mahiligon sa mixed martial arts.
“Usa sa akong gihandom mahuman na kini nga pandemya aron makabalik na ug trabaho ang mga tao nga anaa sa combat sports,” matod niya.
Ang IATF mitugot sa running, biking, golf, swimming, tennis, badminton, equestrian ug skateboarding sa lugar nga naa sa GCQ or MGCQ.
Ang basketball ug football gitugan nga mo resume sa training apan para lamang sa mga propesyonal nga atleta sa Philippine Basketball Association ug Philippine Football League.