LIMA ka barangay captain sa Cebu City gipaesplikar sa Department of the Interior and Local Government (DILG) Central Visayas nganong wa sila kabadlong sa mga tawo nga nagsugal ug nanggawas nga wa magsul-ob og facemasks.
Sila gimandoan sa pagpasabot sa giingong kapakyas nila sa pagpatuma sa mga polisiya ug regulasyon ning enhanced community quarantine (ECQ.)
Gipang-isyuhan ni DILG 7 Director Leocadio Trovela sa Martes og show cause orders sila si Barangay Captains Catalina Cabardo (Basak Pardo); Harry Eran (Cogon Pardo); Lourdes Ramirez (Sto. Niño); Clifford Jude Niñal (San Nicolas Proper), ug Michael Gacasan (Guadalupe) ug nga sakop sa Sangguniang Barangay.
Ning-serve sa SCO mao sila si manlalaban Louthera Christie Rizon ug Christian Fernandez.
Mga opisyal gihatagan og 48 oras sugod sa ilang pagdawat sa mando pagduso sa ilang sinuwat nga pagpasabot nganog di sila ikiha og kapakyasan sa paghimo sa ilang mga kaakuhan ug gimbuhaton isip mga local chief executive.
MILO GIBASOL
Apan nialma si San Nicolas Proper Barangay Captain Clifford Jude Niñal sa show cause order.
Gani andam siyang tubagon kini pero para niya di makiangayon nga ang barangay captain ang mag-esplikar sa insidente nga segun niya gibuhat sa mayor’s information and liaison office (Milo).
Gipaesplikar si Niñal human adunay rice distribution nga gibuhat sa barangay kon diin nahitabo kini lapas sa curfew hours ug gipatapok lang ang mga tawo. Matod niya nga ang rice distribution gipasiugdahan sa Milo personnel.
Pagkahibawo nila nga adunay nagtapok, kuyog ang mga tanod, niresponde sila’ng Niñal sa lugar diin nahitabo ang distribution, apan gikataw-an lang sila pag-abot didto.
Matod niya nga papaulion na unta nila ang mga tawo apan adunay mga pulis nga ni-escort sa pagpanghatag sa mga bugas. “Amo na unta sila’ng papaulion unya naa man diay pulis maong nagtuo mi nga authorized ra siguro sila. Maong igo nalang mi niingon nila nga mag-social distancing sila,” sigun ni Niñal.
Si Cogon Pardo Barangay Captain Eran niingon nga ila nang gipang-imbargo ang mga basketball goal ug volleyball poles ug nets sa ilang barangay nga maoy gigamit sa ECQ violators.
Matod ni Eran nga aduna nay mga tanod ug kapulisan nga gibutang sa mao nga lugar para malikayan ang pagbalik sa mao nga insidente.
Samtang si Guadalupe Barangay Captain Gacasan gipaesplikar human adunay reklamo ang usa ka residente nga adunay magtapok sa ilang dapit matag gabii ug magsaba-saba.
Matod ni Gacasan nga niingon ang complainant nga wa moresponde ang barangay sa reklamo.
Niesplikar si Gacasan nga niresponde ang mga tanod, apan wala na’y taw pag-abot sa mga tanod.
Si Basak Pardo Cabardo gipaesplikar sa nahitabo nga gambling session sa Sitio Ulap, Basak Pardo.
Si Cabardo, niadtong Sabado, nangayo na og dugang pulis para pagpabantay sa maong lugar aron wa nay sugal.
Si Santo Niño Barangay Captain Ramirez gipaesplikar sab human adunay picture nga nag-viral sa social media nga naay mga residente sa ilang barangay, apil mga bata, naa sa gawas sa ilang mga panimalay ug wa nagsul-ob og face mask.
Matod ni Ramirez nga aduna nay gi-assign nga tanod sa lugar para pag-roving og 24 ka oras ug nag-request nasad siya sa Police Station 3 para pag-istalar og outpost sa lugar. (dugang taho ni WBS)