GIKALIPAY og dako sa magtiayon kinsa mga trabahante sa Davao City nga sugod karong Byernes, Hulyo 10, maka-angkas na siya sa iyang bana padung sa trabaho.
Kini human nga temporaryo nga gidili ang pag-angkas sa mga motorsiklo subay sa Omnibus Guidelines sa community quarantine aron malikayan ang pagtakboy sa coronavirus disease (Covid-19).
Sumala ni Vergie Narvaez, 34 anyos, factory worker sa Sasa sa dakbayan sa Davao, nga nalipay siya og dako kay makatipid na sila sa pamasahe.
"Nalipay kaayo kay ma-less na ang gasto. Pero kung moangkas, kinahanglan gyod nga dunay face mask ug kung mamahimo dili kaayo modikit sa bana," saysay ni Vergie atol sa virtual interview sa Superbalita Davao.
Una niini, gipamahayag ni Department of the Interior and Local Government (DILG) Secretary Eduardo Año Huwebes, Hulyo 9, nga sugod karong Byernes, tugotan na ang mga singgol nga motorsiklo nga dunay angkas, apan asawa lamang ang angkas niini ug ang mga direktang miyembro sa pamilya ug mismong ang uyab basta nagpuyo sa usa ka panimalay.
"Yes simula bukas (Hulyo 10) ay papayagan na natin 'yung backriding para sa mga couple... Living in the same household whether they are married or they are common-law husband and wife or boyfriend and girlfriend but they are living in the same household," sulti ni Año.
Dugang niya, "Well sa ID naman sigurado pareho ng apelyido. Kung halimbawa naman ay hindi magkapareho ng apelyido mag common-law husband and wife ay meron silang the same address sa ID nila. Kung live-in sila gano'n din the same address din. So there are so many ways para mapatunayan na they are living in the same house."
Giaprobahan kini sa National Task Force (NTF) Against Covid-19 human sa prototype proposed ni Bohol Governor Arthur Yap. Sa maong kasabutan dunay imuntar nga babag sa motorsiklo tali drayber ug sa angkas.
"Meron siyang barrier in between the rider at saka passenger pagkatapos ay meron din siyang handle sa side nung barrier at lalampas hanggang ulo niya 'yung barrier para sigurado na walang laway na tatalsik and at the same time kailangan mag wear pa rin ng mask at saka ng crash helmet yung ating passenger at rider," sulti sa opisyal.
Sa maong pagkaagi, di na gyud mamahimong makaangkas ang kulokadidang sa pipila ka drayber nga nagluib sa ilang misis.
Samtang sa bahin sa habal-hahal drayber, lisod alang kanila nga butangan pa og babag, apan wala silay mahimo kung kini ang pamaagi aron sila makabalik sa pamasahero nga maoy ilang nahimong panginabuhian.
"Kasagabal ba, pero wala tay mahimo kung kana ang mando sa gobyerno, kinahanglan gyud nato tumanon," butyag ni Henry Galvez, 21 anyos, nga taga Barangay 31-D, Roxas Extension, siyudad sa Davao.