GIILA nga ikasiyam nga labing wanted sa Tacloban City, Leyte nadakpan sa kapulisan sa Huwebes sa hapon, Hulyo 9, sa Barangay sa Bacayan, Siyudad sa Sugbo.
Ang nasikop sa joint operation sa Regional Intelligence Unit (RIU)-7 Visayas Field Unit, Criminal Investigation and Detection Group (CIDG) 8 ug Tacloban Police Station giilang si Edilberto Badajos, 29, lumad nga taga Barangay Tigawon 1, Dakbayan sa Tacloban.
Gidakop si Badajos pinasikad sa warrant of arrest nga giluwatan ni Presiding Judge Georgina Uy-Perez sa Branch 7 sa Regional Trial Court (RTC) sa Tacloban City sa kaso nga lugos nga way girekomendar nga piyansa.
Ang operasyon gipangulohan ni Police Lieutenant Colonel Arthuro Brual, Jr.
Matod ni Brual nga si Badajos nagtago-tago og sugod dinhi sa Dakbayan sa Sugbo sa miagi pang tuig.
Si Badajos nagtrabaho isip helper sa usa ka tindahan sa aluminum nga mga dapat sa balay sud na sa pipila ka mga buwan.
Kasamtangan siyang gibilanggo sa rehiyonal nga buhatan sa CIDG 7 samtang gihikay pa ang mga dokumento alang sa pag turnover kaniya sa mga pulis sa rehiyon 8.(BBT)