MATOD pa ni Department of Environment and Natural Resources (DENR) Secretary Roy Cimatu, dako ang kahigayunan nga lugakan ang kurintinas sa Cebu City ngadto sa general community quarantine (GCQ) gikan sa enhanced community quarantine (ECQ) karong Hulyo 16, 2020.
Apan si Cimatu, overseer sa Covid-19 response sa Sugbo, niingon nga di tanang mga barangay sa siyudad ang malugakan kay ang 20 ka mga dapit nga dunay labing taas og mga kaso sa Covid-19 ug daghan ang nangamatay, magpabilin ubos sa “hard lockdown.”
Mao na ni ang gihulagway ni Cebu City Mayor Edgardo Labella nga ang kurintinas sa syudad sa Sugbo morag sayaw sa Sinulog – duha ka lakang abante, usa ka lakang atras. Kadtong ubos sa hard lockdown, morag kandilang giugbok.
* * *
Ania sa Sugbo ang usa ka team sa mga eksperto sa contact tracing nga gipangulohan ni Baguio City Mayor Benjamin Magalong. Ang Baguio City malampuson sa gubat batok sa Covid-19 tungod sa contact tracing system ginamit ang kapulisan ug ang “cognitive interview” nga gipatuman ni Magalong.
Si Magalong maoy mobansaybansay sa kapulisan sa Sugbo sa contact tracing nga mahinungdanon aron makontrolar ang pagkuyanap sa coronavirus, ilabi na kon kadtong carrier sa maong balatian way sintomas ug nagpadayon sa pakighimamat sa laing mga tawo.
Apan matod sa mga eksperto, mahimo lang kini kon paspas ang testing. Kon dugay nga mogawas ang resulta sa testing, ang mahitabo, mahimong daghan nga positibo sa maong sakit nga wa pa kahibawo kay wa pa may resulta.
* * *
Si Cimatu niingon nga kon ibutang ang Cebu City ngadto sa GCQ, hayan ibutang sa usa ka “granular lockdown” ang 20 ka mga barangay sa syudad nga taas pa ang mga kaso sa Covid-19.
Ang granular lockdown, matod niya, wa magpasabot nga ang entiro barangay ibutang ubos sa hard lockdown. Mahimong usa ka sityo, usa ka karsada o usa ka balay lang ang ibutang sa hard lockdown, depende sa sitwasyon sa dapit.
Niingon si Cimatu nga dako ang papel sa mga barangay kapitan sa pagpugong sa mga tawo sa ilang dapit nga di manggawas sa ilang mga balay ug kanunay motuman sa mga health protocol sa kagamhanan. Mas dako ang papel sa katawhan kon di sila manggawas sa ilang balay kon way hinungdan, bisan kon wa diha ang kapitan.