NALIPAY og makadiyot ang mga tigmotorsiklo kay mahimo nang makaangkas ang kapikas sa kinabuhi. Apan napawong ra sab dayon ni kay dunay lisod nga rekisito. Gikinahanglan nga dunay barrier sa tunga-tunga sa motorsiklo nga mag-uwang sa driver ug angkas. Kinahanglan nga ang barrier molapaw pa sa ulo sa driver ug angkas.
Gawas nga hinanggaw ning mao nga polisiya sa kagamhanan, nagbutang kini sa kakuyaw sa kinabuhi sa magtiayon. Nagdugangdugang usab ni sa galastuhan taliwa sa kalisod nga giantos karon sa katawhan. Tinuod karong adlawa magsugod ang pagtugot sa kagamhanan, apan duna na bay mapalit nga barrier nga nasubay sa desinyo ni Bohol Governor Arthur Yap? Wala pa. Busa, way kapuslanan ang pagtugot sa kagamhanan.
Kining mao nga polisiya di makapugong sa pagkatap sa coronavirus disease (Covid-19) kay wa may magtiayon nga magbuwag og katulog. Naa man gani ubang bana ingon sa maghuramentado na kon di padulgon sa asawa bisan usa lang ka gabii.
Ang barrier nagbutang sa kakuyaw sa kinabuhi sa magtiayon. Daghan na sa mga disgrasya sa mga highway nga ang nakaingon mao ang aerodynamics sa motorsiklo ug scooter. Kon kusog ang hangin ug tungod sa kagaan sa sakyanan, dunay mga higayon nga natumba ang two-wheeled transport.
Maapektuhan gani ang motorsiklo kon makasugat og dagkong mga trak sa highway nga ingon sa mosuyop sa two-wheeled nga sakyanan, unsa na kaha kon naa kining dakong barrier nagbuntaog sa lingkuranan sa motorsiklo?
Kuyaw na man gani tong gihinayon pang pagbutang og dakong plaka atubangan sa motor, unsa na kaha ang dakong barrier?
Di barato alang sa mga kabus ang barrier nga palitunon. Kon minos pang supply ug taas ang demand, seguradong taga liog ang presyo ani. Laing palas-unong gasto sa mga pamilyang naghingutas na karong panahuna sa tumang kalisod. Hinanggaw na ang unang hukom, misamot na hinuon karon ning mao nga polisiya.