ANG Philippine Sports Commission (PSC) ug Philippine Olympic Committee (POC) mi-endorso sa Inter-Agency Task Force (IATF) nga tugtan na pagbalik sa ilang training ang upat ka national athletes nga naka-qualify na sa 2021 Tokyo Olympics.
Gi-endorso sab sa PSC ngadto sa IATF nga tugtan na sab nga maka-training og balik ang mga atleta nga adunay dako nga poruhan nga maka-qualify alang sa matag upat ka mga tuig nga kompetisyon.
Ang Pinoyng mga atleta nga naka-qualify na sa kompetisyon mao sila si gymnast Caloy Yulo, pole vaulter EJ Obiena, ug mga boksidor nga sila si Eumir Felix Marcial ug Irish Magno.
Gipangkonsiderar nga adunay dakong poruhan nga maka-qualify sa pretihiyusong kompetisyon mao sila si 2016 Rio Olympics weightlifting silver medalist Hidilyn Diaz, world champion female boxer Nesthy Petecio, Sugboanong skateboarder Margielyn Didal, Pauline Lopez ug karateka Junna Tsukii.
Mao kini ang gituki sa PSC board pinaagi sa virtual meeting kauban sila POC President Representative Bambol Tolentino, ug POC Secretary-General Atty. Ed Gastanes niadtong Martes, Hunyo 7, 2020.
Ang duha ka mga kampo nagkasabot nga magtutok lang usa sa Olympic bid.
“We initiated the meeting with POC with the good of our national athletes in mind. Always a priority as Chairman Butch Ramirez always say,” batbat ni PSC officer-in-charge, Commissioner Ramon Fernandez.
Gidugang ni Fernandez nga ilang gitan-aw ang tanan nga posibilidad alang sa mga Olympic hopefuls ug sa upat nga naka-qualify na.
“Covid-19 notwithstanding, we must never lose sight of our goal to give our best for our first Olympic gold,” matod ni Fernandez.
Matod sa kampo sa PSC nga ang pinal nga desisyon anaa sa mga kamot sa IATF.
Sa umaabot nga mga adlaw, makighugpong sab ang PSC ni Tokyo Olympics Chef de Mission Nonong Araneta.
“The POC will know who has and where we have a high percentage of qualifying so we will consult them and move from there,” sigon ni Fernandez. (RSC)