ISIP pasalamat sa mga grasya nga iyang nadawat, si Olympian Mary Joy Tabal mohatag og duha ka bag-ong pares sa Asics brand nga mga sapatos sa suwerteng batan-ong mga atleta atol sa iyang ika-31 nga adlawng natawhan karong Lunes, Hulyo 13, 2020.
Giklaro ni Tabal nga ang puwede lang mahatagan niini mao ang mga atleta nga mokombati unta sa 2020 Palarong Pambansa nga nakanselar gumikan sa hulga sa coronavirus disease 2019 (Covid-19).
“Kabalo ko unsa ka dako para sa mga batang atleta ang Palarong Pambansa ug unsa kasakit sa ilaha ang pagka-cancel niini. Mao sila akong gipili nga pwede makaapil ani atong gamay nga contest,” butyag ni Tabal sa Superbalita Cebu.
Ang mechanics mao ang pag-comment sa atleta sa post ni Tabal diin tubagon niini ang pangutana kon unsay epekto sa Covid-19 sa ilahang pagka-atleta, mga pagtulun-an nga ilang nakat-unan taliwala sa pandemya, ug mga butang nga ilang buhaton para sila makabangon gikan niini.
Ang lumad nga taga barangay Guba, Cebu City mopili og duha ka mga atleta nga nindot og tubag ug mao sila ang maka-angkon sa bag-ong Asics nga sapatos.
“Ga-request ko sa Asics kon pwede ko maka-ask og shoes nga ako ihatag as birthday giveaways sa Palarong Pambansa-bound athletes. Para maka-inspire ug maka-motivate pud sa ilaha, maski duha ka pairs. Mohatag ko sa usa ka babaye ug usa pud ka lalake nga atleta,” matod ni Tabal.
Ang batan-ong mga atleta pwedeng motubag sa post ni Tabal kutob karong Dominggo, Hulyo 12, 2020 pinaagi sa Facebook o Instagram.
I-anunyo ni Tabal ang mga mananaog sa iya mismong adlaw nga natawhan.
“Naay ni-join nga dili Palarong Pambansa-bound athletes pero mao man ako mechanics, priority gyud nato tong mag-Palarong Pambansa unta kung wala pa nahitabo ang Covid-19 pandemic,” dugang ni Tabal.
Ang gold medalist sa 2017 Southeast Asian (SEA) Games ug silver medalist sa 2019 Manila Games buot makadasig sa batan-ong mga atleta nga magpadayon lang sa ilang damgo bisan sa kalisod sa panahon karon.
Si Tabal nagsugod sab sa iyang karera sa Palarong Pambansa diin midaog siya og bronze medal dihang nagtungha pa siya sa Guba Elementary School.