SUPERBALITA CEBU

Serna: Nagmingaw human Sky Direct gi-shutdown

kyaw-kyaw

SUKAD nga wa nay salida ang akong telebisyon tungod kay gi-shutdown ang Sky Direct, bisan unsa na lang ang akong nahunahunaan aron di magmingaw ang balay.

Hapit tibuok adlaw kong magpa-sounds sa FM stations sa Dumaguete ug Siquijor ug ang mga nakolekta nga CD ug DVD.

Maayo na lang kay mga mga tanom sab ko sa nataran nga akong tan-aw-tan-awon matag karon ug maoy hinungdan nga mainitan ko sa haring adlaw.

Matud pa ni Super Bobby Nalzaro, tungod kay ubos na man sa Modified General Community Quarantine (MGCQ) ang kadaghanan sa mga local government units sa lalawigan, tingali pwerte nakong langoylangoy sa dagat.

Sa tinuod lang, lahi kaniadto sa nagtrabaho pa ko sa Cebu City, di gyud mahitabo nga di ko makaligog dagat sa di pa mobalik sa syudad.

Pero karon, mora mag di na kaayo kusog ang pagdani sa dagat ug hapit na usa ka tuig nga wa ko makaligo sa dagat tungod sa duha ka rason: una, kay kuyawan kong maatlan nga dunay katol,ug ikaduha, kay wa ko makapalit og sunblock sa wa pay quarantine. Haha!

Arte ra ba? Di man god ko gustong ma-sunburn kay sakit kaayo sa panit ug labinang di ko gustong mapaksit ang akong panit.

Pero kon makatayming kong taub ang dagat sa sayo sa buntag o sa hapon, asa ra man gyud kang dagata ka? With matching flippers, goggles ug swimboard pa. Anà!

Balik ta sa pagka way salida sa TV. Nadiskubrehan nakog balik ang mga dugay na nakong napalit nga mga DVD sama sa Golden Hits sa Abba, ang konserto nga Dreams Come True sa Westlife, ang pelikula nila ni Kate Hudson, Matt Dillon ug Owen Wilson nga “You, Me & Dupree”.

Daghan pang mga pelikula ug mga serye nga nagpaabot nga akong mapili-an ug mapasalida. Duna pa gani koy 15 ka mga serye nga Koreano nga hinatag sa akong ig-agaw sa Catmon nga si Ely dela Cerna Dickinson nga wa pa gyud nako mahikap.

Inig sayong gabii, magpasingot na sab ko pinaagi sa pagbisikleta libot sa pila ka mga karsada sa lungsod. Human sa 20 ngadto sa 30 minutos, padayon kong magpasingot ginamit ang pipila ka mga kahimanan nga akong natigum sa nagtrabaho pa ko sa Kapitolyo.

Morag lingaw na kaayo no? Hmmm, kulang. Lahi ra gyud kon duna pay salida sa TV. Makakita ug makadungog ko sa mga balita gikan sa TV Patrol ug sa 24 Oras.

Wa pay labot ang mga programa nga nasubay na tungod sa quarantine. Kanus-a pa kaha makabalik ang SkyDirect?

Hinaut nga hapit na. Aron, sumala pa sa akong FB post, “makatulog ko nga may pahiyom sa leps.” Haha! Anà!


VIEW COMMENTS
DISCLAIMER:

SunStar website welcomes friendly debate, but comments posted on this site do not necessarily reflect the views of the SunStar management and its affiliates. SunStar reserves the right to delete, reproduce or modify comments posted here without notice. Posts that are inappropriate will automatically be deleted.


Forum rules:

Do not use obscenity. Some words have been banned. Stick to the topic. Do not veer away from the discussion. Be coherent. Do not shout or use CAPITAL LETTERS!

sunstar.com.ph