MGA pulis ug sundawo apil na sa teams sa contact tracers sa posibleng mga masakiton sa coronavirus disease (Covid-19) sa Dakbayan sa Sugbo.
Ila usab nga gamiton ang katakos sa intelligence gathering sa pagsubay sa mga Covid positive.
Mao kini ang gibutyag ni Police Regional Office (PRO) 7 chief Brigadier General Albert Ignatius Ferro human sa duha ka adlaw nga contact tracing training nga gipangulohan ni Baguio City Mayor Benjamin Magalong.
Si Ferro niingon nga ang ilang pamaagi sa contact tracing susama na og imbestigasyon sa high profile nga mga kaso.
“Our campaign against Covid-19 should be intelligence-driven. We should know the real situation because if we will not be appraised of the real situation, we won’t be able to address the problem,” matod ni Ferro.
Gawas sa mga pulis ug sundawo, gitambungan usab ang training sa mga doktor, nurse ug ubang mga kawani sa kagamhanan.
Human natapos ang training, sugdan na usab nila ang ilang trabaho nga langkoban sa Regional Intelligence Division, Cebu City Intelligence Branch ug ubang law enforcement agencies nga misalmot sa seminar.
Iyang gipaneguro nga ang mga contact tracer dunay mga galamiton sa pagpanalipod gikan sa Covid.
“We have to train our people on how they could effectively proceed with contact tracing and well protected as well because kana man kon matakdan tong atung mga contact tracers, mag collapse ang atung pag identify sa mga possible infection area diri sa Sugbo,” matod ni Ferro. (AYB)