SUBLING gipahibalo sa Philippine Health Insurance Corp. (PhilHealth) ang medical frontliners ug allied workers ilang gitanyagan og full hospitalization coverage kon matakdan sa Covid-19 ning panahon sa pandemic.
Ang PhilHealth niluwat og pahibalo sa pagpahinumdom sa mga tagdumala sa ospital sa nasod nga dili pabayron ang mga pasyente sa Covid-19 nga naa sa medical front lines.
Mao kini tubag sa PhilHealth sa panawagan nga suporta ni Presidente Rodrigo Duterte alang sa healthcare workers ug frontliners sa pag-ila sa ilang gibuhat nga risgo sa matag adlawa.
Kini nalatid sa PhilHealth nga Circular No. 2020-0011 sa ahensiya nga pinetsahan og Abril 14, 2020 nga nagtugot sa “full financial risk protection for Filipino health workers and patients against coronavirus disease.”
Sa maong circular, gipasabot nga ang health workers mao ang nagtrabaho sa health ug health-related nga tahas, bisan unsa pa ang employment status niini, naglakip sa mga doktor, nurses, allied health professionals, administrative ug support personnel sa pasilidad sa panglawas, utility ug security personnel nga nadistino sa health facilities, health volunteers sa health facilities ug staff ug personnel nga nagtrabaho sa ahensiya sa panglawas sa kagamhanan.
Sa pagkakaron, ang PhilHealth Regional Office 7 nakabayad na og P13 milyunes saalang sa benefit claims sa hospitalization tungod sa Covid-19.
Gawas sa full coverage, kining health workers makakuha usab sa PhilHealth benefits alang sa SARS-CoV-2 testing package nga mobalor og P901 ngadto sa P3,409 subay sa nalatid sa Circular No. 2020-0017.
Sa kasamtangan, dunay upat ka accredited SARS-CoV-2 testing centers sa Central Visayas: Vicente Sotto Memorial Medical Center; Allegiant Regional Care (ARC) Hospitals, Inc. sa Lapu-Lapu City; Cebu TB Reference Laboratory sa Cebu City; Prime Care Alpha Covid-19 Testing Laboratory located sa Mactan Cebu International Airport (MCIAA).
Ang PhilHealth nipahinumdom sa mga tagdumala sa ospital nga pwedeng mapasakaan og silot kon masuta nga nibalibad sa pagpag-admit o gipabayad ang health workers sa ilang pagpatambal sa Covid-19.
Giawhag usab ang publiko sa pagsuporta sa maong pabor nga gitugot sa balaud ug motaho dayon sa bisan unsang kasayoran sa pag-abuso o pagpabayad sa bahin sa health care providers. (WBS gikan sa PR)