HELLO! Niadtong Mayo 26 tuig 2020 namugna ang "Panabo Barter Community (PBC)."
Mahitungod ani ang atong chicka, higala. Sa kasamtangan nga kahimtang, katuyoan sa PBC ang paghatag og pamaagi o dalan nga makapagdinaitay ang mga katawhan sa komunidad pinaagi sa "pagbarter" o "pagkambyohanay" sa ilang gipanag-iyahang mga butang (bag-o o gamit na). Usa kini ka lakang sa pagtabang sa matag-usa nga haum kaayo sa sitwasyon nato karon sulod sa pandemya.
Ang kasaysayan sa barter trading nagsugod pa kaniadtong 6000 BK (Bag-o kang Kristo). Gipaila sa mga tribo sa Mesopotamia ug gikopya sa mga Fenicia. Gibaligya sa mga Fenicia ang mga butang nga naa sa lainlaing mga lungsod tabok sa kadagatan. Ang mga taga Babilonya usab nagpalambo sa usa ka labi ka maayong sistema sa pagbarter.
Sa wala pa ang pagpaila sa usa ka pormal nga salapi sa Pilipinas, ang pamatigayon gihimo usab pinaagi sa barter system. Sama sa kung gusto sa mananagat pakambyohan og bugas iyang mga isda -- pwede kaayo sa kantidad o kadaghanon pod sa iyang produkto. Sa ulahing dapit, ang "piloncitos" (gagmay nga piraso sa bulawan) ug mga singsing sa bulawan ang gigamit sa pagbarter.
Kaniadtong 1898 pagkahuman nakakuha og independensya ang atong nasud Pilipinas, ninggula ang una nga lokal nga salapi.
Karon 2020, anaa sa 2,926 nga aktibong miyembro ang kabahin sa PBC gamit ang facebook community. Just like any groups or organizations, aduna poy mga balaud nga ginapatuman ang PBC aron han-ay ang matag- trasaksyon.
Pipila nini ang mga mosunod: pagsulat sa hustong impormasyon sa butang nga imong pakambyuhan, paglakip og litrato niini, pagsulti sa kasamtangang kantidad ug kondisyon niini, impormasyon sa butang nga gustong nimong nga baylo, lugar kung asa magbinayloay, ug uban pa (sama sa usa nimo ka sakong bugas pakambyohan og lima ka tanum nga cactus, sa daang palengke magtagbo, alas tres sa hapon ugma).
Dili pwede mag PM (Private Message sa facebook) kung dili ma "deal" o magkasinabot daan sa fb page. Obserbahan pod ang social distancing, wearing of masks, ug uban pang hygiene protocols.
Kung unsay naa sa litrato ug unang kantidad nga gisiwat nimo sa fb mao ra gyud to- bawal usbon ilabi na nga daghang interesado sa imong item. Kung naay damage ang item o kung nagamit na kini -- IPAHIBALO POD DAAN UNA MAG 'DEAL." Ang uban man god bintahuso (NINDOT SA PICTURE -- guba sa aktwal) walay kahadlok sa gaba.