KORONADAL CITY -- Padayon pa karong mihimo og dugang imbestigasyon ang kapulisan aron nga matumbok ang mga suspek ug motibo sa pagluthang patay sa mayor sa Sto. Nino, South Cotabato.
Si Mayor Pablo Matinong gipusil sa duha ka wala mailhing tawo nga sakay og motorsiklo pasado alas 8 sa buntag kagahapon, Biyernes, Hulyo 10.
Nasayran gikan sa imbestigador sa Sto. Nino Municipal Police Station nga nagbaktas lang si Matinong sa may Purok Libertad, Barangay Poblacion aron nga inspeksiyonon ang usa ka proyekto nga gipahimutang luyo sa barangay hall.
Apan sa wa damhang hitabo, duha ka wala mailhing suspek nga sakay og motorsiklo miagi sa tungod sa mayor ug usa kanila ang miluthang kaniya tumong sa ulo ug likod nga bahin sa lawas gamit ang giingong kalibre .45 nga pistola.
Human maigo ang mayor, mga mamumuno dali nga misibat paingon sa hilit nga dapit sa maong lugar.
Wa pay matudlo nga suspek sa maong hitabo apan kapulisan sa Sto. Nino Municipal Police Station naningkamot nga masulbad ang maong niluog nga pagpatay sa mayor.