Dear Noy Kulas,
Maayong adlaw. Ang akong problema ang akong ex-boyfriend sa college pa ko.
Mao ni ang among sugilanon. Three years ming nagkauyab, apan naputol ang among communicatiion dihang nilarga siya sa Manila.
Mga two years kong nagpaabot until naka decide ko nga mag move on. Daghan ang nanguyab nako niadtong wa na siya pero nag-hope pa ko nga naa siya, wa ko manguyab og lain.
Until akong na meet ang akong bana. Nakaanak mi og duha. Pero tungod sa aksidente, namatay siya. Nagtuo kong dimalas ko sa akong lovelife kay nakakita na ko og buotan nga tawo, pero gikuha og sayo sa Ginuo. Sa wa lang nako damha, nagkakita mi sa akong ex last December. Wa ko kasabot sa akong gibati, pwerte namo nga hangop. Namawi mi sa among kamingaw, kada adlaw ming nagkita ug pirme mi mosangko og motel.
Wa siya mosulti sa iyang tinud-anay nga status until adtong February nga ako siyang gipahibawo nga mabdos ko. Ingon sa nahugno siya kay di siya makadawat kay diay minyo na siya. Sa wa pa ang quarantine, nibalik siya sa Manila ug di na nako siya ma-contact.
Unsa may akong buhaton karon, Noy Kulas? Ako ba siyang magukod unya aron manubag siya sa iyang responsibility?
TINA
Tin,
Kon duna kay mga electronic communication nga naghisgot parte ini, ayaw to tangtanga o i-delete kay basin pa, imong magamit nga ebidensya nga duna moy relasyon ug nagbunga ni. Gawas niana, mahimong imong ipa-DNA ang bata but mao lagi, mahal pa gyud ni karong panahuna.
Naa na man na, atubanga ang problema kay wa suliran nga di masulbad kon pangitaan og mga solusyon. Pahibaw-a lang ang imong pamilya sa imong giatubang nga suliran kay wa may laing makatabang nimo, sila ra sab.
Pait ug bug-at man tuod, apan nagtudlo nimo ni og leksyon nga di angay nga magpadala sa gibati kon moabot ang panahon nga sama nianang imong nasugatan. Niadtong panahuna, weak ka kaayo tungod kay taudtaud nang nawala ang imong bana ug wa moy klarong closure sa imong ex. Nag move on ka tuod, apan deep inside you still longed for him.
Pag-ampo, pangayog kusog ug kaisog sa Ginuo ning laing pagsuway sa imong kinabuhi. Way problema nga way kasulbaran. Tuo lang.
NOY KULAS