SUPERBALITA CEBU

Teen Romance: Crazy for you

(Katapusan sa pito ka mga gula)

Sa misunod nga mga adlaw, dako na kaayog kausaban ang akong kaugalingon ug pagbati. Di na ko ganahan nga mosul-ob og linaki. Labaw na nga di na ko magpatawag og Brendo sa akong mga friends. Brenda na gyud.

Na, makamao na kong mangarte. Mobutang na kog nipis nga lipstick. Mamulbos na sab ko sa akong nawong.

Porbida, wa gyud ko magdahom nga mahimo kong tinuod nga babaye. Ug usa ka adlaw ana, nagkita mi ni Ronron. Di na ko motawag niyag Rona kay para nako, usa siya ka tinuod nga lalaki.

Sus, misiga ang akong mga mata pagkakita kang Ronron. Tinuod na gyud siyang lalaki tan-awon sa gisul-ob niyang karsones maong ug sa poloshirt.

“Hello! Ganina ka ra, Bren?”

Mao sab ang tingog ni Ronron, di na pinaluray, tingog na gyud sa usa ka lalaki.

“Nia nag-antos sa kaguwapa.”

Mikatawa ko. Nahikatawa sab si Ronron.

“Parehas diay ta, Bren. Mao sab ko, nag-antos sa kaguwapo. Nag-aper mi si Ronron. Ug unya, nagkatinan-away mig dugay. Miduko ko. Wa ko kaharong sa tinan-awan ni Ronron nako. Kusog ang pagbutuk-butok sa akong dughan. Naunsa ba ko, uy? Nahigugma na kaha kog tinud-anay? Hilom kong nakaingon.

Sa pagpanglabay sa mga adlaw, mingawon na gyud ko kaayo kang Ronron. Gusto ko nga makita ug ikaestorya siya kanunay. Na, morag nagkabuang na ang pinitik sa akong kasingkasing ngadto kang Ronron. Hilom sab kong naglagot kang Ronron. Unsa sab kaha ang iyang gibati nako? Kon love sab ko niya, gipangulitawhan na unta ko niya. Kanunay gud ming magkita ug magteksanay labi nag gabii panahon sa among pagpanghigda.

Di ko mahimutang kon di makapadalag text messages ngadto kang Ronron.

Hangtod nga mao na lay akong namatngonan nga mihugo ko, midaot ang akong lawas kay di ko ganahan mokaon ug wa koy tarong nga kinatulgan.

“I love you, Brenda,”

Usa ana ka hapon, morag gibayaw ko sa cloud nine pagkadungog ko sa gisulti ni Ronron samtang nanuroy mi sa palibot sa among simbahan sa lungsod. Nindot kaayo kog smile ngadto niya.

“I love you, to, Ron.”

Ug nag-holding hands na mi ni Ronron. (KATAPUSAN)


VIEW COMMENTS
DISCLAIMER:

SunStar website welcomes friendly debate, but comments posted on this site do not necessarily reflect the views of the SunStar management and its affiliates. SunStar reserves the right to delete, reproduce or modify comments posted here without notice. Posts that are inappropriate will automatically be deleted.


Forum rules:

Do not use obscenity. Some words have been banned. Stick to the topic. Do not veer away from the discussion. Be coherent. Do not shout or use CAPITAL LETTERS!

sunstar.com.ph