MIPIRMA og kontrata ang kanhi pambatong sentro sa Brgy. Ginebra Gin Kings nga si Greg Slaughter sa BeoBasket, usa ka European agency nga nagdumala sa basketball careers sa ubay-ubay nga mga magduduwa sa National Basketball Association (NBA).
Gipaambit sa 7-footer nga basketbolista kining maong kalambuan sa iyang Instagram account kagahapon.
“I am very happy to announce that I’ve signed with @misko4raznatovic, owner of BeoBasket, the biggest international basketball agency in the world,” post sa produkto sa University of the Visayas (UV) Green Lancers nga napatik sa GMA News Online.
“I am also extremely honored to be the first Filipino player in their roster.”
Basi sa ilang website, ang BeoBasket mao ang adunay labing daghang gidumala nga mga magduduwa sa NBA sa tanang European agencies.
Lakip sa mga gipangdumala niini mao sila si Nikola Jokic, Boban Marjanovic ug Dario Saric.
Si Slaughter, 32, nipahibalo nga mopahuway una siya pagduwa sa Philippine Basketball Association (PBA) human napupos ang iyang kontrata sa Ginebra sa miaging season apan wala kini nibutyag sa iyang mga plano sa umaabot.
Matod ni Ginebra coach Tim Cone nga sa iyang nasayran, mosuway pag-try out si Slaughter sa National Basketball Association (NBA) G League.
“Wherever my journey takes me, I will always proudly represent the Philippines, especially our National Team,” matod ni Slaughter.
Ning bag-uhay lang, gipadayag ni Slaughter ang iyang intensyon nga makailog og luna sa Gilas Pilipinas nga mokombati sa 2023 Fiba Basketball World Cup. (ESL)