Nadela: Abante, mga backrider

Gitugutan na ang backrider sa mga motorsiklo. Galing lang may mga balaod nga angay sundon. Pastilan. Tugtan man tuod apan may kondisyon pa nga angay tumanon.

Nakasulay ba kaha og backride sa motorsiklo ning mga tawhana? Kong nakasulay man gani panginabuhi bay hinungdan nganong niangkas sila?

Lahi man gud ning mo-backride ka nga panginabuhi gyud ang tuyo kay sa lulinghayaw lang imong gusto.

Dugay na ning gipangayo sa katawhan ilabi na niadtong nanginabuhi gamit ang ilang motorsiklo.

Ang mga asawa nga ihatod unta sa ilang mga bana sa trabahoan nag-antos na lang intawon og baklay kay wa man say jeep o bus nga masakyan.

Ang uban gani niining mga asawa mga frontliner diha sa mga tambalanan. May mga anak nga angay ihatod sa ilang trabaho pinaagi sa motorsiklo.

Gidid-an bisan kon balido kaayo ang mga rason. Dugay nang naghangyo ang mga local government unit (LGU) tungod kay ilang nakita ang ka mahinungdanon niini para sa ekonomiya.

Gibalibaran kay supak sa protocol pagbatok sa pandemya. Karon nikalit lang og anunsiyo nga pwede na. Ubos sa pipila ka kondisyon.

Niduyog ko sa pagtuo sa uban nga kini pangpaluag lang sa dughan sa mga apektado. Itugot ra man diay nganong gilangay langay pa. Ang pait pa gyud kay kinahanglan pa nga mogasto aron matuman ang desinsyo nga gipatuman.

Kinsa man sa atong mabuot nga mga motorista ang may malumong kasing kasing nga mopasakay og libre sa mga tawo nga nagpaabot og masakyan diha sa karsada saludo ko ninyong tanan.

Wa kaayo ni mahatagi og espasyo bisan diha sa social media, alang nako wa moy kalainan sa mga frontliner niining gubat nga atong giatubang.

Pananglit ang mga lab-asera nga manghangyo nga makasakay kutob sa usa ka bahin sa may South Road Property nga maoy nahimutangan sa bag-ong Fish Market sa dakbayan sa Sugbo.

Kanang makakita ka nga gihunongan sila og pribadong sakyanan, bation sab ta og kalipay. Mga nagtrabaho og supermarket nga mag-atang og masakyan matag buntag nga tanan unya takulahaw lang maglumba og sakay sa nihunong nga sakyanan.

Ang uban nahimo na gani nilang suki nga andam og tagana nga mopasakay sa nanginahanglan.

Si Teban Gabiana usa sa gipasakay padung mangumpra sa Carbon Market. Dako ang iyang pasalamat nga may nalooy kaniya.

Human maka kumpra para sa gamayng tindahan sa iyang ig-agaw diin siya nitabang sa pagpa ninda, nangita siya og masakyan balik sa ilaha. Kay way masakyan nslahukom siya nga magbaktas nalang bisan kong bug-at kaayo ang iyang dala.

Related Stories

No stories found.
SunStar Publishing Inc.
www.sunstar.com.ph