Albor: Giputlan sa hagong

Dakong pagtulon-an ang mosuki ug mosaway sa gobyerno. Tulo na ka dekada gipasira ang ABS-CBN sa diktadoriyang rehimen ni Pres. Ferdinand Marcos. Nagsugod og sibya sa 1953. Vice Pres. Fernando Lopez maoy usa sa mga tag-iya. Panahon ni Pres. Cory Aquino nakabalik sa sibya ang lima ka AM, 18 ka FM, 10 ka digital broadcast channels ug 42 ka TV stations. Republic Act 7766 ubos sa gahom sa kongreso nakakuhag prangkisa sulod sa 25 ka tuig nga mapopos sa Marso 30, 2020 apan nainat sa Mayo 4, 2020.

Gidungog sa kongreso ang renewal application sa ABS-CBN apan giyak-an. Mayo 5, 2020 ang National Telecommunications Commission (NTC) nga gisangonan sa regulatory functions miluwat og cease and desist order. Dili sab makahatag og provisional authority kay napopos naman ang prangkisa. Giputlan sa hagong ang 10,955 ka mga kawani.

Sa sayo pa nasuko si Pres. Rodigo Duterte sa ABS CBN sa wala pagpagula sa iyang campaign ads sa 2016 bisan nakabayad na kay tua makapusta sa LP ni Mar Roxas. Peb. 10, 2020 Sol-Gen Jose Calida misang-at og quo-warranto petition ngadto sa Supreme Court batok ABS-CBN Corporation ug subsidiary Convergence, Inc. nga rebokahon ang prangkisa, usa ka special civil action sa ngalan sa nasod batok sa mga kalapasan. Pag-abuso nga nakapabulahan sa pipila ka mga mapahimuslanon gasto sa minilyon ka subscribers, binayran nga broadcast nga nakalapas sa mga lagda nga gisitar sa kongreso sa 1995, mitugot sa langyawng investors nga kalapasan sa konstitusyon, pag-abuso sa pribilihiyo nga gihatag sa estado paglusad sa pay-per-view channel TV Plus nga KBO nga walay permiso sa NTC. Gikwestiyon sab ang dual citizenship sa ABS-CBN Chairman Gabby Lopez III.

Danag ang pamahayag sa napriso Sen. Leila de Lima nga ang ABS-CBN hulipan ni Duterte sa iyang mga chronies o China-backed entities. Magpataka ra bag tugdon ang katahap sanglit amigo sila Duterte ug Chinese Pres. Xi Jinping, suod na sila magpapatigayon Manny Pangilinan ug Dennis Uy nga nailang dumadapig.

House Speaker Alan Peter Cayetano mitulisok sa NTC sa wala pag-isyo og provisionary franchise permit. Lakang sa ABS-CBN pag-awhag sa kongreso nga mabag-o ang franchise, petisyon nga ipahunong ang cease and desist order nga giluwatan sa NTC ug mosyon nga aksyonan sa Supreme Court ang ilang pangaliyupo nga makabalik sa pag-broadcast. Apan hangtod karon wala pay tino nga kalamboan ang pagpiit sa ABS-CBN. Kon basihan ang linawas nga pasundayag wala mapatay si Cardo sa iyang teleserye nga Probinsyano apan gitapos sa NTC.

(csa_1156@yahoo.com/09064648954)

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph