Gawas sa dakbayan sa Talisay, lungsod sa Minglanilla sa habagatan ug lungsod sa Consolacion sa amihanan, ang ubang bahin sa lalawigan sa Sugbo hayahay na ang kahimtang sa mga lumolupyo human gipaubos sa modified general community quarantine (MGCQ).
Ang naasoy nga tulo ka local government units (LGUs) sa lalawigan nagpabilin sa enhanced community quarantine (ECQ) tungod sa taas gihapon nga kaso sa Covid-19. Sa Hulyo 15, Miyerkules, mahibaw-an kon dunay kausaban o magpabilin sa ilang status sa kwarentina.
Susaman kini sa status sa tulo ka mga dakbayan sa Sugbo, Mandaue ug Lapu-Lapu nga naa sa ECQ. Gilauman nga moubos sa general community quarantine (GCQ) human sa Hulyo 15 kon masuta nga mominos na ang kaso sa Covid-19, daghan ang maayo sa sakit ug magpadayon nga dili daghan ang namatay.
Mao kini ang panglantaw ni Secretary Roy Cimatu sa Department of Environment and Natural Resources (DENR) nga gitudlo sa presidente nga overseer sa Inter-Agency Task Force (IATF) sa Kabisay-an nga nag-monitor sa Covid-19 crisis sa rehiyon.
Sa lalawigan nga ubos sa MGCQ nga nakukaan ang limitasyon sa paglihok sa katawhan, apan hugot gihapon nga gipatuman ang batakang protocol sa panglawas aron dili mobalik sa pagtaas ang kaso, sama sa kampanya nga kanunay nga pagpanghugas, pagsul-ob og face mask, social distancing, gidili gihapon ang dinaghang panagtapok ug uban pa.
Si Police Colonel Roderick Mariano, direktor sa Cebu Provincial Police Office (CCPO), nagkanayon nga magpadayon ang ilang hugot nga pagbantay sa border checkpoints sa kalungsoran apan ilang sundon ang nalatid nga IATF sa pag-downgrade sa kwarentina sa lalawigan ngadto sa mas luag nga status.
Hayahay na ang sitwasyon sa lalawigan apan ang katawhan gipasidan-an nga wala pa hingpit mapapas ang risgo sa Covid-19.
Busa, magpuyo sa bag-ong normal ug modayon sa atong inadlaw-adlaw nga kalihokan uban sa hagit sa naasoy nga sakit.