Lalake gidakop sa SAF kay wa makapakitag ID

GIDAKOP sa mga sakop sa Special Action Force (SAF) ang usa ka tawo nga ilang nasugatan nga way identification (ID) card nga napakita kay lain ang ngan niini sa nakabutang sa quarantine pass nga iyang dala samtang sila nagpatrolya sa Barangay Basak San Nicolas, Dakbayan sa Sugbo sa Biyernes sa buntag, Hulyo 10, 2020.

Ang pagdakop nakuhaan og video ug nag-viral sa social media.

Matod ni Police Captain Francis Renz Talosig, hepe sa Mambaling Police Station sa Cebu City Police Office, gidakop sa mga sakop sa SAF si Reynato Sanchez, 46, taga Sityo Tabasca, Barangay Basak San Nicolas, tungod kay way mapakita nga ID human nakit-an sa SAF nga ang quarantine pass di iyaha.

Makita sa video nga nangisog si Sanchez ug nagsige og lugnot gikan sa mga sakop sa SAF nga nidala kaniya sa police station.

Nasamad sa ulo si Sanchez di tungod kay gihilabtan siya sa mga pulis, kon di siya ang nipukpok og unay sa kaugalingon gamit ang usa ka bato.

Matod ni Talosig nga nasuta nila nga duna diay apan sa pangisip si Sanchez human sila gipasabot sa kabanay nga nikuha niini sa ilang station.

Apan pasakaan gihapon og kaso si Sanchez tungod sa paglapas sa Article 151 o resisting arrest, ingon man kalapasan sa Republic Act 11332 subay sa enhanced community quarantine (ECQ) guidelines. (BBT)