30 migawas sa CCQC, naayo na sa Covid-19

ANG Cebu City Quarantine Center (CCQC) nipagawas na usab og laing 30 ka recovered patients sa Covid-19, Biyernes, Hulyo 10, 2020.

Kini maoy ikaupat nga pagpagawas sa management sa CCQC og mga pasyente gikan sa maong pasilidad human kini nahimong operational o nisugod og admit sa mga pasyente sa Covid-19.

Ang 30 ka mga pasyente nihatod sa 129 ka indibiduwal nga nakagawas sa maong pasilidad kinsa adunay mild ngadto sa moderate nga simtomas sa maong virus .

Si Yvonne Cania, ang tagdumala sa CCQC, nagkanayon nga adunay nahabiling 60 ka mga pasyente ang nahabilin sa quarantine facility nga padayon pa nilang giatiman human sila nakapagawas kagahapon dihang nag-negatibo na sila sa simtomas.

Nahimong mga emosyonal ang mga kanhi Covid-19 positive sanglit sulod sa 14 ka adlaw nilang paglain uban sa mga intervention sa mga mananambal gikan sa Cebu City Medical Center (CCMC).

Ang mga naayo sa Covid gihatagan sa Cebu City Government og tag 25 kilos nga bugas humay para aduna silay malung-ag inig pauli sa ilang tagsatagsa ka pinuy-anan.

Ang CCQC maoy gipatukod ni Mayor Edgardo Labella para moatiman sa mga Covid-19 positive nga way ikagasto sa pribadong tambalanan.

Ang mga na-admit ug nangaayo sa Covid-19 nagpasalamat og dako ngadto sa administrasyon ni Labella sanglit libre ang ilang pagpatambal diin ilang gihulagway nga kon didto pa sila nalandig sa private hospital hayan naproblema na sila sa bayranan.

NAAYO SA LAPU-LAPU

Moabot sa 26 ka mga bag-ong recovery ang natala sa dakbayan sa Lapu-Lapu, Huwebes, Hulyo 9.

Malipayon silang gipagawas na sa isolation facility sa dakbayan human sa pipila ka semana nga gipaubos sa isolation.

Lakip sa 26 ang moabot sa 5 ka sakop sa Lapu-Lapu City Police Office (LCPO) nga nataptan usab sa Covid-19.

Ang lima kabahin sa 12 ka mga sakop sa LCPO nga nataptan sa coronavirus.

Si Lapu-Lapu City Mayor Junard Chan maoy nangunay pakighinabi sa Covid-19 survivors diin gitagaan usab sila ug mga certificate isip paghatag ug bili sa ilang malampusong pakigbatok sa Covid-19.

Sa kinatibuk-an moabot na sa 227 ka mga recovery ang natala sa dakbayan sa mokapin 800 ka mga kaso.

Mapasalamaton si Chan sa walay puas nga pag-atiman sa mga sakop sa City Health Department sa mga pasyente nga nakarekober ug ingon man ang anaa pa karon sa isolation center.

Gihangyo ni Chan ang mga Covid survivors nga lain nilang tahas sa ilang pagbalik sa ilang tagsa-tagsa ka mga panimalay mao ang pagpahimangno sa katawhan nga dili tiaw ang naasoyng sakit.

Gawas nga makamatay kini dili usab lalim ang ma-isolate sa pamilya samtang magrekober ka sa Covid-19.

Magsilbi na usab silang mensahero sa kagamhanan sa ka importante sa kanunay pag facemask gumikan kay mao kini bugtong panagang karon sa naasoyng virus.

Sa talaan sa dakbayan kasagaran sa bag-ong mga nagpositibo mga mag-pamilya busa giawhag sa mayor ang mga adunay pamationg hilanat, ubo ug sip-on sa pag isolate lang daan sa ilang panimalay aron kalikayan ang pagtakod takod sa ubang kabanay.

Mas maayo usab, matod ni Chan, nga dili magdungan og kaon hilabi na sa mga kabanay nga mga trabahante sanglit sila ang exposed kaayo sa gawas.

“Bisag hilantan og usa, duha ka oras lang pahibaw-a atong gobiyerno kay moadto ang gobiyerno sa inyong panimalay to check ug ang katong gihilantan wala ba magka Covid para maabagan, maatiman ang tibuok pamilya while waiting the result the city government will provide them sa ilahang kinahanglanon tibuok adlaw nga pagkaon so that it will not spread,” matod ni Chan. (PAC, GCM)

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph