SUPERBALITA CEBU

Laing kawani sa Talisay namatay sa Covid; bata, 5, nataptan sab

LAING kawani sa Dakbayan sa Talisay ang gituohang namatay sa coronavirus disease (Covid-19).

Ikaduha na kini nga kawani sa Talisay City Hall nga gidudahang namatay sa mao nga sakit.

Ang kawani nga namatay sa Biyernes, Hulyo 10, nagtrabaho sa opisina sa senior citizens sa Talisay City Hall.

Ang unang namatay nga kawani nadestino sa City Treasurer’s Office (CTO).

Si Talisay City Vice Mayor Alan Bucao nagkanayon nga base sa mga impormasyon nga iyang nakuha, nataptan sa Covid-19 ang duha ka mga babayeng kawani.

“I cannot confirm nga sila namatay sa Covid ha kay duna man gyud tay mga authorized person ug office nga maoy mosulti ana. It’s either ang atong mayor or ang city health office maoy mo confirm ana,” pasabot ni Bucao.

Samtang si City Budget Officer Edgar Mabunay nagtuo nga naulian na ang iyang kauban sa Covid.

Apan nakalitan nalang siya sa balita nga iyang nadawat nga namatay kini.

Ang mao nga kawani dugay na niyang kauban.

Magpadayon ang ilang pag-disinfect sa mga opisina sa Talisay City Hall tungod ning mao nga mga hitabo.

ABAG

Nagplano si Bucao nga mohangyo siya kang Mayor Gerald Anthony Gullas Jr. nga makagahin og kantidad nga mahatag ngadto sa pamilya sa mga namatay isip tabang kay sila makonsiderar na nga frontliner.

Dugang sa bise mayor nga iyang tun-an kon unsa pa ang mahatag nga tabang sa Siyudad ngadto sa mga pamilya sa nabiling mga kawani.

Iyang paningkamutan nga mapasar ang usa ka resulosyon sa ilang sesyon karong Martes.

“Naa may plano ang mayor nga mohatag ug hazard pay ngadto na sa mga kawani mao na nga ako sang tun-an subay sa DILG rules and regulation nga ako sang ikonsulta sa budget nato sa health nato,” matod ni Bucao.

Samtang si Konsehal Richard Jones Aznar, chairman sa committee on health, niingon nga wa pay kamanduan nga undangon ang disinfection ilabi na nga lain nasab nga kawani ang namatay.

Matag Martes ug Biyernes ang ilang pag-disinfect sa matag buhatan. Ang Siyudad sa Talisay usa sa tulo ka mga dapit sa Lalawigan sa Sugbo nga ubos sa general community quarantine (GCQ).

Bisan kon GCQ, si Gullas, uban ang kapulisan mipahugot gihapon sa mga pagpatrolya aron ipatuman ang mga quarantine protocol.

BATA GI-COVID

Usa ka 5 anyos nga batang babaye ang nagpositibo sa Covid-19 sa Dakbayan sa Talisay.

Kini ang gipahibawo sa Kagamhanan sa Dakbayan subay sa ilang Facebook page post niadtong Huwebes sa gabii.

Ang bata nga taga Barangay Mohon gihulagway nga chemo patient, nakasinati og influenza like illness (ILI).

Naa siya sa pribadong tambalanan ug padayon nga giatiman. Ang 5 anyos nga bata nalakip sa 14 ka bag-ong mga kaso sa Covid-19 sa dakbayan.

Uban sa 14 ka bag-ong mga kaso ang walo ka recoveries o naulian na. Duna say nataptan nga mga nanganak.

Sa monitoring sa Kagamhanan sa Dakbayan sa Talisay, nagpangidaron og 17, 28, 33, 20 ug 26 anyos ang mga bag-ong nanganak nga nataptan sa Covid nga pulos asymptomatic.

Ibalhin sila sa usa ka isolation center facility.(BBT)


VIEW COMMENTS
DISCLAIMER:

SunStar website welcomes friendly debate, but comments posted on this site do not necessarily reflect the views of the SunStar management and its affiliates. SunStar reserves the right to delete, reproduce or modify comments posted here without notice. Posts that are inappropriate will automatically be deleted.


Forum rules:

Do not use obscenity. Some words have been banned. Stick to the topic. Do not veer away from the discussion. Be coherent. Do not shout or use CAPITAL LETTERS!

sunstar.com.ph