MIPALIT ang Dakbayan sa Mandaue og 42 ka dustproof ug waterproof body cameras alang sa mga emergency responders ug traffic enforcers.
Nakadawat ang Traffic Enforcement Agency of Mandaue (Team) og 30 ka mga body camera samtang ang City Disaster Risk Reduction Management Office (CDRRMO) gihatagan og 12.
Mogana ang body camera susama sa dash camera sa mga sakyanan nga ang mga footage naka-save sa memory card.
Sa Facebook post sa Mandaue City Public Information Office, sul-obon sa mga traffic enforcers ang body camera aron ma-record ang operasyon sa enforcer labi na sa mga gibadlong nga motorista.
Giistudyohan na nga malahi ang pagtagad sa usa ka tawo ngadto sa enforcers labi na kung makahibawo nga ang ilang pag-engkwentro naka-record.
Pinaagi sa body cameras, makita nga way gitagoan ug responsable ang mga enforcer. Gani makapataas kini sa salig sa katawhan ngadto sa mga enforcer.
Sa pakighinabi sa Superbalita Cebu kang Arnold Malig-on, operations chief sa Team, nga ang gipagamit nila sa mga body camera ang mga traffic enforcer nga na-assign sa dagko nga interseksyon.
Sa di pa moadto sa gi-aassign nga interseksyon ang mga traffic enforcer, kuhaon usa nila ang mga body cameras.
Sigon ni Malig-on nga sa panahon nga makuha na nila ang body cameras, nagsugod na kini og record.
Giabisohan na sab ang mga enforcer nga dili hilabtan ang body camera ug dili pawngon sa bisan unsa nga sirkumstansya.
Ang battery life sa body camera muabot og 12 oras ug sigon ni Malig-on una nila ihatag sa enforcer, full-charge na kini.
Mamahimong makapangayo ang publiko og kopya sa kuha sa mga body camera kon aduna silay reklamo batok sa enforcer, aron mahimong ebidensya sa paghusay sa mga reklamo, sigon Malig-on
Matag human sab sa duty sa mga enforcer, iuli sab nila ang mga body camera ngadto sa ilang headquarters aron ibalhin ang recorded files sa ilang server aron sab ilang ma-review.
Samtang sa DRRMO, sigon ni Felix Suico Jr., ang CDRRMO operations chief, nga gamiton nila ang mga body camera sa panahon nga moresponde sila sa bisan unsang mga alarma.
Kada human sa pagresponde sa mga alarma, iuli sab ang mga body camera sa information technology department nila aron i-review.
Ang mga footage mamahimong magamit sa DRRMO aron ma-review o ma-evaluate nila ang mga lihok sa responders sa panahon nga moatubang sa mga hagit sa pagresponde.
Magamit sab ang mga footage isip parte sa ilang training programs.