MOKABAT sa 342 ka mga tawo nga nakalapas sa curfew sa Dakbayan sa Talisay ang nadakpan sa kapulisan gikan sa Hulyo 1-10, 2020. Apan tungod sa hugot nga pagpatrolya sa Talisay Police Station, anam nga nikunhod ang gidaghanon sa ilang nadakpan. Sa Hulyo 10, unom na lang ang ilang nasikop.
Sa Hulyo 1, nakadakop ang kapulisan og 75 ka violators. Sa Hulyo 2 (62); Hulyo 3 (63); Hulyo 4 (34); Hulyo 5 (18); Hulyo 6 (43); Hulyo 7 (15); Hulyo 8( 17); Hulyo 9 (9); ug Hulyo 10 (6).
Si Police Major Ace Pelare, hepe sa Talisay police, nagtuo nga nagkagamay ang mga tawo nga nadakpan sa paglapas sa curfew tungod sa subsob nilang pagpatrolya.
Matod ni Pelare nga ilang gihingusgan ang mga pagpatrolya tungod sa mando ni Mayor Gerald Anthony "Samsam" Gullas Jr.
Tumong niini mao ang pagpugong sa pagkuyanap pa sa coronavirus disease (Covid-19) sa siyudad.
Ang Talisay City usa sa tulo ka mga dapit sa Lalawigan sa Sugbo nga ubos sa general community quarantine (GCQ). Ang laing duha mao ang Minglanilla ug lungsod sa Consolacion nga taas usab og Covid infections.
Ang ubang mga dapit sa Lalawigan sa Sugbo ubos na sa modified GCQ sugod niadtong Hulyo 1, 2020. (BBT)