KINSA kahay ikabinukbokay ni Floyd Mayweather Jr. ibabaw sa ring atol unya sa iyang pagbalik sa arena sa boksing?
Ang way pilde nga Amerikanong boksingero nga naghupot og (50-0) win-loss record nagkanayon nga mobalik siya og away karong 2020 subay sa iyang post sa Instagram.
“Soon I’m going to hop on my jet to Tokyo, Japan for a meeting with my partners and Rizin for something this year 2020. Stay tuned,” padayag ni Mayweather.
Ang post gipakapinan ni Mayweather og pipila ka segundo nga shadow boxing ug niabot na og 2.5 million views sulod sa duha ka adlaw.
Ang gipasabot ni Mayweather mao ang kompaniya sa Japan diin siya niaway sa usa ka exhibition game niadtong bisperas sa Bag-ong Tuig sa 2018.
Sa maong away, iyang nabulsa ang $10 milyones sulod lamang sa usa ka round batok sa batan-ong kickboxer nga si Tenshin Nasukawa kinsa nikita og $4 milyones matag minuto sa maong away.
Ang 43 anyos nga retired boxer nipadayag kaniadto nga magpabilin siyang retirado ug motutok nalang sa pagbansaybansay og mga batan-ong boksidor didto sa Las Vegas.
Apan daw dili kini matuman gumikan sa kakatol sa kamot ni Mayweather ug mobalik og sul-ob sa gloves ibabaw sa ring para sa gibanabanang 9 figures nga paycheck.
Gumikan sa anunsyo ni Mayweather, nag-anam og kahayag ang gipaabot sa mga tawo nga posibleng ikaduha nilang panag-abot ni Senator Manny Pacquiao kinsa kapin na sa usa ka tuig sa paghinuwat nga moaway sa Amerikanhong boksidor.
Si Pacquiao maoy nakadawat sa WBN isip Fighter of the Year Award niadtong 2019 human niya gipukan ang kanhi way pildeng Amerikano nga si Keith Thurman niadtong July.
"Floyd Mayweather, if you want a real fight, fight me. If you want an exhibition, my guy, my friend, Jack Ma will take care of you," padayag ni Pacquiao sa niaging tuig dihang nag-uban sila ni Jack Ma sa China. (PAC)