NAGKAUYON ang coaches sa 12 ka Philippine Basketball Association (PBA) teams nga mabuhat nila ang mga safety protocol nga gi-kinahanglan sa liga para magpabiling luwas sa coronavirus ang mga players.
Ang paagi sa PBA mao ang pag require sa tanang teams nga magpa coronavirus disease (Covid-19) test tulo kaadlaw sa di pa sila mobalik og training sa ilang pasilidad.
Human niana, ang mga team members mopaubos napud og laing Covid-19 testing kausa matag 10 ka-adlaw. Ang mga pasilidad moagi og disinfection gamit ang hospital standard disinfection procedures, lahi pa niana ang before-and-after workout disinfection.
"I think it's good. All we have to do is follow it," matod ni Barangay Ginebra coach Tim Cone sa report sa PBA.PH
Ang mga players kay manduan usab nga limitahan ilang mga lakaw sa balay ug practice facility lang. "I think the PBA has put up an effective guideline to safeguard the players. It's just a matter of attitude from the players to maintain it," matod ni NLEX coach Yeng Guiao.
Dugang sa kanhi Gilas Pilipinas coach nga wala siyay nakita nga problema niining mga safety guidelines nga gihiman sa liga. Ang pagsunod niini ana na sa disiplina sa mga player.
"It's up to them if we intend to keep everyone safe. Everybody should practice discipline at all times if we want this league to survive and likewise protect their livelihood," matod ni Guiao
Si San Miguel Beermen (SMB) coach Leo Austria nagkanayon nga naghinamhinam na siya nga makauban og balik ang iyang mga player. Usa sa saligand ni Austria mao ang lumad nga taga Pinamungajan, Cebu nga si June Mar Fajardo.
Ang higanteng alumni sa University of Cebu mao ang naghupot sa record nga pinakadaghang Most Valuable Player (MVP) award. Si Fajardo midaog sa iyang unom ka MVP award gikan sa 2014 to 2019.
"It's been four months (since the lockdown). So we really missed each other a lot. Having the opportunity to be together and workout together is a relief for everybody", batbat ni Austria.
Si Austria niingon nga ang players dapat mag practice sa 3 Ds (discipline, determination and dedication) inig balik na unya sa training para sa safety ug kaayuhan sa tanan.
Ang coaches ug team managers nag-meeting sa PBA office kauban sila Commissioner Willie Marcial, Deputy Commissioner Eric Castro and Legal Counsel Atty. Melvin Mendoza para sa mga guideline kon magsugod na ang team ug individual workout. (RSC)