HULYO 9, 2019 ang adlaw dihang nakumpleto ang pagkababaye ni Marythel Magaway tungod kay sa maong adlaw iyang gihimugso ang iyang unang liwat.
Ang bata gipanganlan nila sa iyang partner nga si Arnold Mbuyu og Summer Ayanna.
Sa gabii sa wala pa manganak si Marythel, nakahilak siya gumikan kay giingnan siya sa iyang doctor nga basin og ipaubos siya og Cesarean section kay niabli na ang iyang panubigan.
Maayo na lang kay natawo ang bata pinaagi sa normal delivery alas 11:15 sa buntag pagka sunod adlaw.
Duha ka buwan pa lang kini diha sa sabakan ni Marythel dihang nahibaw-an sa 34 anyos nga inahan nga siya mabdos diay didto sa Macau.
Usa ka kanhi Overseas Filipino worker si Marythel sa maong lugar diin sila nagkaila ni Arnold, ang amahan sa bata, kinsa usa ka football player.
Niadtong Huwebes, Hulyo 9, gisaulog sa banay nga Magaway ang unang kasumaran sa adlaw nga natawhan ni Summer Ayanna.
Ang birthday party nahitabo sa ilang panimalay sa lungsod sa Ubay, probinsya sa Bohol.
Ang pamilya ni Marythel lumad nga taga dan Cabreros, siyudad sa Sugbo apan namalhin og puyo sa Bohol.
Apil sa mga pagkaon nga giandam alang sa mga bisita ang lechon baboy, hotdog, bam-i, spaghetti, buttered chicken, ice cream, ginamay, cake ug daghan pang mga putahe.
Mga suod nga higala sa ilang pamilya, mga kaliwat ug silingan ang niduyog sa kasaulogan.
Usa ka duwaan nga awto ug kwarta ang regalo nga gihatag sa amahan ug inahan alang sa birthday sa ilang anak. (SCG)