NAHIBAWO man unta ang atong mga lider sa kamahinungdanon sa exercise, nganong gidili man ang outdoor nga ehersisyo sama sa biking, jogging ug walking? Mahimo man unta kini nga i-regulate nga naa gihapon ang health protocol sama sa social distancing, pagsul-ob og face mask ug pagdili sa panagpundok.
Importante ang exercise, igong pagpainit sa adlaw sa pagkombate sa sakit. Makapalig-on kini sa immune system.
Wa pa say scientific study nga ang outdoor nga exercise nagpakatap sa kagaw. Ang mga pagtuon nagpakita nga mas aktibo ug mas paspas ang pagpanakod sa indoor nga mga dapit. Sakto lang nga di itugot una ang gym activities ug ubang contact sports.
Nalipay lang sab hinuon kong magtan-aw nga nanaghan na ang nag bike to work, labina sa mga medical personnel nga di maka afford og mahal nga de makinang transportasyon.
Panahon na nga ang mga tag-iya og patigayon ug edipisyo, maghuna-huna sa pagbutang og mga pasilidad, sama sa bike parking. Karon nga duna nay umaabot nga “new normal,” gikinahanglan kaayo ang mga pasilidad diin luwas nga ikabutang ang mga biseklita ug makailis og sapot ang mga personnel.
NAHILOM
Human makabutang ang Mandaue City og bike lanes, nahilom na ang Siyudad sa Sugbo. Di na hinuon ni ikahibung kay wa man gani nahitabo sukad napasar ang Sugbo Bike Lanes ordinance nga daghan og inputs gikan sa bikers. Napasar kini niadto pang 2014.
Nahuman na lang ang termino ni Bise Mayor Michael Rama kay siya pa ang mayor niadtong higayuna ug kang kanhi mayor Tomas Osmeña, wa gihapon ni mahisguti.
Kon matuman kini sa pamunoan ni Mayor Edgardo Labella, mamahimo kining legasiya sa iyang administrasyon. Makaingon ko nga kini ang administrasyon nga forward looking, di backward.
MODERNO
Sa ako nang giingon, ang biseklita kabahin na sa urban planning sa modernong mga siyudad. Sa akong kasinatian, pag-adto nako og Guangzhou, China, ikatulong labing dako nga metropolis sa mao nga nasod, daghang mga tawo nagbiseklita, babaye ug lalake.
Unya moingon kag moderno? At least 10 years silang ahead sa atoa. But bisan pa niini, ang biseklita dako og papel sa accessibility sa transportasyon sa ilang siyudad.
Kita? Nagpilit kita sa daang mentalidad nga ang biseklita samok sa karsada, alang lang sa mga kabus. Pagkapobre sa mao nga panghuna-huna.