PIPILA ka mga kaila ang nakahinumdom nga kaniadtong Hulyo 11, 1985 gidagit sa mga armadong tawo si Fr. Rudy Romano diha sa Barangay Tisa. Sa mao gihapong adlaw, gidagit sab si Levi Ybañez diha sa dalan Sanciangko.
Lakip kini sa mga panghitabo kaniadtong grabi ang kangitngit ubos sa diktaduryang Marcos.
Alang kanako, ug ako kining gihisgutan diha sa akong Facebook post, ang paghinumdum ni Fr. Romano nagdala og inspirasyon karong anaa usab kita sa kangitngit.
ABS-CBN
Alang kanako, dili lang bawos tungod niadtong usa ka advertisement sa 2016 ang hinungdan nga gipasirad-an gyud ang ABC-CBN. Human napirmahan ang Anti-Terror Law, gisiguro dayon sa administrasyon nga masirad-an ang maong estasyon sa telebisyon.
Sa akong pangagpas, gibuhat kining pagsirado aron dili magsigi og atake ang maong estasyon sa kandidato unya sa administrasyon labi na inig duol sa 2022.
Apan duna koy lahi nga panglantaw. Karong grabi ang kagutom ug kasuko sa mga tawo sa ilang kahimtang, maayo na lang unta nga duna silay paagi nga makapahungaw sa kayugot. Dayon, molingaw pa gyud ang ABS-CBN kanila.
Sama kinig nagbukal na ang tubig apan wala kini karoy kapahungawan. Kakuyaw sa maong kahimtang. Ambot kon madala pa ba kining kagutom ug kahadlok.
PATAY NA?
Naay ni-forward kanato diha sa Facebook nga nakadawat sila og certificate nga naka-recover na ug na-discharged na ang ilang lolo nga si Fructoso Gacasan Mabatid sa Barangay Camputhaw human kini na-Covid-19. Pinirmahan ang maong certification ni Dr. Daisy Villa sa Cebu City Health Department.
Gipetsahan ang maong dokumento og Hulyo 3, 2020.
Wala akoy paagi karon sa Talisay samtang nagsulat niining lindog aron ma-confirm ang maong dokumento.
Nireklamo man gud ang niangkon nga apo nga wala naka-recover ug na-discharge ang ilang lolo. Nganong nakaingon sila niini? Kay namatay na man intawon ang tiguwang sa miaging Mayo 30, 2020.
Matod pa, nakadesisyon ang mga paryente sa miaging May 28, 2020 nga ilang ipa-admit na ang tiguwang kay naglisod na og ginhawa. Wa dawata sa duha ka pribadong mga ospital ang pasyente. Busa, naabot sila sa Vicente Sotto Medical Center (VSMMC).
Gi-swab test ang pasyente nianang adlawa.
Pagka May 30 sa gabii, gitawagan sila sa doctor nga namatay intawon ang pasyente. Pagka ugma dayon, ilang gilubong si Mabatid sa sementeryo sa Carreta.
Apan nganong pagka Hulyo 3, nakadawat man sila niining giingong certificate ni Dr. Villa. (@anol_cebu sa Twitter)