SA PAGBISITA ni Baguio City Mayor Benjamin Magalong sa Dakbayan sa Sugbo, iyang gihisgutan ang kamahinungdanon sa contact tracing sa pagsumpo sa coronavirus disease (Covid-19). Matod niya, matag team, labing daghan duha ra ka mga kaso ang kuptan. Iyang katarungan, kay sa usa lang ka kaso, mga 153 ka tawo ang contact niini.
Niadtong higayuna, ang Siyudad sa Sugbo duna lay 35 ka teams. Apan target ni Mayor Edgardo Labella ang 80 ka tracing teams. Buot pasabot nga tag usa ka team sa matag barangay. Apan kon basehan gihapon ang sulti ni Magalong, kuwang ra gihapon kini.
Human sa training nga gipangulohan ni Magalong nga giapilan sa mga pulis ug sundawo, naumol ang 130 ka tracing teams. Hapit dobleha ang gidaghanon sa teams nga target ni Labella.
Matod ni Magalong nga mahinungdanon kaayo ang kakusog sa contact tracing sa mga positibo sa Covid. Lain usab tingali nga paspasan mao ang paghuman dayon sa swab testing.
Nganong gikinahanglan ang paspas nga contact tracing? Ang kadali sa pagpugong sa lihok ug isolation sa tawo nga posibleng nagdala sa virus gikinahanglan kaayo aron di na siya maka contact pa sa laing mga tawo. Mga tawo nga posibleng makapanakod og lain.
Matod ni Magalong, sa usa lang ka tawo, 153 ang ma contact niini. Imagine sa matag usa sa 153 naa say laing contact, unsa kataas ug ka lapad sa posibleng nangatakdan?
Nganong gikinahanglan usab ang paspas nga testing? Aron daling madala sa isolation centers ang nagdala sa kagaw. Sa ingon di na kini makapanakod sa iyang pamilya ug komunidad. Sa mga lugar nga nagdasok ang kabalayan ug mga tawo, importante kini kaayo. Mao baya ni ang nahitabo sa mga sityo Zapatera ug Alaska.
Sa ato pa, sa kombate sa Covid, di lang lockdown ug pagtuman sa health protocol ang mahinungdanon, apil ang paspas nga contact tracing ug testing.