SUPERBALITA CEBU

Mandaue mipalit og 27 ka dumptrucks

TURNOVER: Si Mandaue City Mayor Jonas Cortes (nagtalikod) nagsud-ong sa unang siyam ka dumptrucks nga napalit sa Siyudad alang sa mga barangay. (Gikan sa Mandaue City PIO)

MIPALIT og 27 ka mga six-wheeler multipurpose dumptrucks ang Dakbayan sa Mandaue alang sa tanang mga barangay.

Sa Facebook post sa Mandaue City Public Information Office, gi-deliver ang unang batch sa maong mga dumptruck niadtong Miyerkules, Hulyo 8, 2020.

Ang unang batch naglangkob sa siyam ka mga dumptruck.

Personal sab nga gipang-apod apod ni Mandaue City Mayor Jonas Cortes, kuyog si Mandaue City Councilor Carmelino del Mar Jr,. ang siyam ka mga dumptruck ngadto sa mga barangay kapitan niadtong Biyernes sa hapon, Hulyo 10, 2020 sa Mandaue City Cultural and Sports Complex.

Ang siyam ka mga barangay nga nakadawat mao ang Alang-Alang, Bakilid,Cambaro, Centro, Casili, Casuntingan, Labogon, Looc ug Tipolo.

Aduna nay nakabutang nga ngalan sa barangay sa atubangan sa mga dumptruck.

Matod ni Cortes nga ilang prayoridad ang kadtong mga barangay nga nanginahanglan sa maong dumptruck tungod ang anaa nila nga trucks naguba na, di na magamit.

Gihatag ang dumptrucks isip ayuda sa dakbayan ngadto sa 27 ka mga barangay aron makahatag og mas nindot nga serbisyo alang sa ilang mga konstituwente.

Gani, ang maong dumptruck mamahimong gamiton sa relief operations, garbage collection, disaster preparedness ug uban pa.

Gipasabot sab ni Cortes nga ang 18 ka mga barangay nga wa pa makadawat basin sa sunod na nga batch sa delivery mahatagan. "Nalangan lang gyud ni ang pagdeliber tungod sa Covid-19," sigon ni Cortes.

Sa laing bahin, ang Barangay Alang-Alang ug Tipolo nagpost sa ilang opisyal nga Facebook page isip pasalamat ngadto sa Dakbayan kay ang dumptrucks dakong ikatabang sa ilang pagserbisyo. (KFD)


VIEW COMMENTS
DISCLAIMER:

SunStar website welcomes friendly debate, but comments posted on this site do not necessarily reflect the views of the SunStar management and its affiliates. SunStar reserves the right to delete, reproduce or modify comments posted here without notice. Posts that are inappropriate will automatically be deleted.


Forum rules:

Do not use obscenity. Some words have been banned. Stick to the topic. Do not veer away from the discussion. Be coherent. Do not shout or use CAPITAL LETTERS!

sunstar.com.ph