WA PAY petsa kon kanus-a makaabli pag usab ang pampublikong merkado sa Barangay Tayud, lungsod sa Liloan human pasirhi sa lokal nga kagamhanan tungod sa nagpositibo sa coronavirus disease nga tindera sa karnehan.
Sa Hulyo 10, gimando sa Lungsod sa Liloan ang pagpahigayon og disinfection ingon man decontamination sa merkado.
"Per the recommendation of the Municipal Health Office and the Philippine National Police, the market will be closed and its operations temporarily suspended for purposes of decontamination, disinfection, and while contact tracing is conducted in coordination with the barangay," matod sa Facebook post sa Lungsod.
Samtang gimando usab ang hinanali nga pagsusi sa mga nakahimamat sa pasyente aron nga largo kini nga i-isolate o ipaubos sa mandatory quarantine.
Tungod niini, nanawagan ang lokal nga kagamhanan sa pagmatngon ug estriktong pagsubay sa health protocol aron di na mapun-an pa ang maong kaso.
Base sa datos sa lungsod sa Hulyo 10, nakatala na kini og 72 ka mga positibong pasyente sa Covid-19, 33 na ang naka-recover apan pito na ang namatay. (ANV)