Covid contact tracing sa Cebu City 'hinay'

USA sa mga opisyal sa Inter-Agency Task Force (IATF) nagtuo nga ang kahinay sa contact tracing sa mga coronavirus disease positive usa sa mga hinungdan sa paspas nga pagkuyanap.

Si retired Major General Melquiades Feliciano, assigned deputy chief implementer for the Visayas, niingon nga ang hinay nga contact tracing hayan maoy nakaingon sa pagkatap sa Covid-19 sa Dakbayan sa Sugbo.

Aron masulbad kini, 130 ka teams sa contact tracers ang gi-train na karon ug karong Dominggo, Hulyo 12, 2020, gipaninguha nila nga makasugod na kini contact tracing sa activities.

Si Feliciano nisulti sa iyang mga assessment atubangan sa Cebu City Council, atol sa online regular session niini niadtong Hulyo 10.

“A large number of Covid-19 positive were not dealt accordingly resulting to spreading (of the virus),” matod ni Feliciano ngadto sa konseho.

“If there’s a proactive contact tracing, you do not wait for the patient to go to you or to the cluster clinics and you’re supposedly the one looking for the suspected and probable (Covid-19 patients),” sugyot sa heneral.

Target ni Feliciano ug sa emergency operations center nga matumbok na ang tinubdan sa mga pagpanakod sa 20 ka mga barangay sa dakbayan nga adunay labing daghang mga kaso sa Covid-19.

Wala hinuon gibutyag ni Feliciano ang mga barangay nga apil sa 20 ka buok.

Sayo sa miaging semana, si Baguio City Mayor Benjamin Magalong nianhi sa Dakbayan sa Sugbo aron motabang sa pagtukod og contact tracing teams.

Sa iyang pag-abot, ang Siyudad duna lay 35 ka tracing teams nga alang kang Magalong, kuwang ra.

Niadtong higayuna, si Mayor Edgardo Labella nagtinguhang motukod og 80 ka tracing teams kun tag usa matag barangay.

Apan si Magalong niingon nga usa ngadto sa duha lang ka kaso ang angay ipahupot sa matag team aron di mahago og maayo.

DI TINUOD?

Nakita sab ni Feliciano nga ang data nga makita sa Department of Health (DOH) nagpakita lamang sa 20-25 ka porsyento sa tinuod nga nahitabo sa ground.

Matod sab ni Feliciano nga kuwang sa komunikasyon ang Emergency Operation Center (EOC), kabarangayan ug health office.

“There are grey areas from coordination of the barangays with the EOC. The EOC is not connected from CESU, RESU... when that happens, they’re now on the loose and no control of monitoring,” matod ni Feliciano.

Sa naorganisar na nga contact tracing teams, ang ilang buhaton ang pag-determinar ug “proactively find the virus in the community,” matod ni Feliciano.

DI PA ANGAY

Gibutyag sab ni Feliciano atubangan sa mga konsehal ug bise-mayor sa Sugbo nga gusto na si Environment Secretary Roy Cimatu, Cebu overseer sa Covid-19 response, nga ablihan na og hinayhinay ang dakbayan sa Sugbo.

Apan alang kang Feliciano, di pa siya mosugyot nga i-downgrade ang community quarantine status sa dakbayan, kondili mabutang ang tukmang mga lakang sa pag-control sa mga pagpanakod.

Apan niingon si Feliciano nga ang national government gihapon ang magbuot sa maong desisyon.

Niuyon usab si Cebu City Vice Mayor Michael Rama kang Feliciano.

Matod ni Rama nga di siya mo-recommend para sa pag-downgrade ngadto sa general community quarantine sa Dakbayan sa Sugbo human sa Hulyo 15.

“If you’re talking about GCQ, and if it were up to me, I will not recommend (for GCQ),” matod ni Rama sa press conference niadtong Sabado, Hulyo 11.

Matod ni Feliciano nga samtang magpadayon ang aggressive contact tracing, ang intensyon sa EOC ang pagpa-drop sa curve.

“The curve is floating on the higher level of the data. The ideal is to drop it to the lowest possible level. We cannot have it zero because there’s no vaccine yet,” matod ni Feliciano.

Giawhag sab ni Feliciano ang mga konsehal ug tanang opisyales sa dakbayan sa pagsalmot sa mga kalihukan batok sa Covid-19.

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph