ATONG gisulayan sa pag-survey sa kahanginan kung unsay sentimento sa katawhan labot sa pagbasura sa renewal sa prangkisa sa ABS-CBN sa Legislative franchise committee panel.
Tungod sa mainiton nga suporta sa mga Dabawenyo sa atong mayor nga atong Presidente Rodrigo Duterte, labaw sa katunga ang uyon nga ibasura ang prangkisa sa maong higante nga broadcasting netwrok.
Daghang mga kasaypanan nga nagpabiling tinago ang ABS-CBN nga wala mautingkay sa dugay nang panahon, kini, tungod kay mura silag untouchable tungod kay sila ang pinakadakong network sa Pilipinas kun mass communication business ang hisgutan.
Dili ikalimod nga maayo gyud sila sa programming, maantigong motempla kon unsay haom nga programa matag oras nga maoy angay tan-awon sa mga mahilig sa telebisyon.
Gani atong namatikdan nga ginakopya ang format sa ilang programa sa ubang network, ug kon ila nang namatikdan nga mihinay na ang ratings sa maong programa, gilayon dayon nilang ilisan.
Pero sa likod diay sa ilang operasyon, daghan silag gitago ug wala kini mautingkay sa nanglabayen’g administrasyon, tungod lagi kay sa pagtan-aw nila kaya nilang bulabulahon ang mga ahensiya sa atong gobyerno, tungod kay malakas o kusgan sila sa naglingkod nga presidente, kay ila mang gisuportahan o kaha kaya ilang uto-utuon.
Nanggawas na ang tanan nilang tinagoan, matud pa, 11,071 ang ilang mga empleyado, apan sa dihang gisusi sa Bureau of Internal Revene (BIR) mokabat lang sa 4,918 lang ang regular nga empleyado ang subra, contract of services and talent lang.
Sa dihang nabisto na ang ilang tinagoan, gidala na nila kunohay ang sentimento sa mga empleyado, nga sa milabay nga panahon, basura alang kanila, nga miabot na’g napulo ngadto sa 15 ka tuig nga walay benipisyo nga gidawat gikan sa mga ahensiya sa atong gobyerno.
Ang Amcara Broadcasting Corp. ubos sa Channel 43, ilang dummy ug ang gigamit nga transmitter sa pag broadcast, gikan sa ilang main sa Mother Ignacia aa Quezon City, kini ug daghan pang kalapasan nga ilang gihilom ug gitago tungod lagi kay powerful sila nga sa ilang pagtan-aw under nila ang gobyerno.
Daghan nang mga politiko nga ilang gibinuangan dawaton ang bayad sa political ads, pero dili ipagawas sa kahanginan, apan sa katapusan, nakatumong sila’g tawo nga dili gusto’g binuang nga ilang gi-under estimate kay hugot gyud ang ilang pagtuo tungod kay probinsiyanong kandidato dili gyud modaug.
Ang prangkisa usa kini ka prebilihiyo ug dili katungod. Sa ato pa, may bahid nga politika kay dili man Supreme Court ang mag-renew?
Busa, kinahanglan paningkamotan unta sa ABS-CBN nga maayo ang ilang relasyon sa mga politiko kay mao kana ang kinabuhi sa ilang negusyo.
Apply as new franchise dili renew, sa sunod nga administrasyon, kana, kon mudaog ang oposisyon? Apan, kon ang suportahan nga kandidato ni Presidente Duterte maoy modaug? ABS-CBN, R.I.P., sayang kay inyong gi-abuso ang maong prebilihiyo.