KIDAPAWAN CITY -- Nagtunol na og mga hinabang ang lokal nga panggamhanan sa dakbayan pangunahan ni Mayor Joseph Evangelista ngadto sa mga pamilya sa usa ka barangay kansang mga balay gilampurnas sa buhawi alas 4:15 sa Sabado sa hapon, Hulyo 11, 2020.
Sa taho gikan sa City Disaster Risk Reduction and Management Office (CDRRMO-Kidapawan), nasayran nga sa wa pa ang kalamidad, nakasinati og pag-ulan ang mga molupyo sa Barangay Lower Kalaisan sa dakbayan.
Apan wala abti og dugay, mga molupyo sa dapit nakasiplat og daw nagtuyok nga hangin, hinungdan nga dali silang nanghapa sulod sa ilang mga balay.
Sa kakusog sa hangin nga nagtuyok, nangalangkat ang atop sa mga kabalayan ug ang uban gipanglarot.
Daghan sab nga punoan sa kahoy ug mga saging ang nangatumba.
Suwerte nga walay naangol sa mga molupyo sa barangay apan gibati sila sa sobrang kahadlok.