SUPERBALITA DAVAO

15 pribadong tunghaan sa Davao manira tungod sa Covid pandemic

Hulagway iya ni Ralph Lawrence G. Llemit

KINSE ka mga pribadong tulunghaan manira human nga grabeng naapektuhan sa coronavirus disease (Covid-19) pandemic.

Kini maoy gikompirma sa Department of Education-Davao Region (DepEd-Davao).

Gisulti ni DepEd Spokesperson Jenielito Atillo ngadto sa SunStar Davao sa dihang nahinabi pinaagi sa telepono nga sa 15, kasagaran kanila nahimutang sa Tagum City uban sa 5 tulunghaan, gisundan sa 3 sa Davao del Norte, samtang tag-duha ang natala sa Davao City, Digos City, ug Island Garden City of Samal, ug usa sa Davao de Oro.

Wa hinuon niya panganli ang maong mga tulunghaan, apan matud niya kasagaran kanila "small business" nga pribadong tulunghaan.

Pipila sa mga hinungdan nga ilang gitumbok sa ilang pagsira mao ang ubos nga ihap sa mga enrollees, resulta nga maglisud na sila og tubag sa galastuhan sa ilang operasyon ug suweldo sa ilang mga empleyado.

"Of course, di man mi makababag if they decided to stop operating. We fully understand nga ang nahitabo is beyond anyone's control," tin-aw ni Atillo.

Hinuon iyang giklaro nga mga nahisgutang tulunghaan nagsulti nga mohunong sa operasyon karon lang nga school year 2020 hangtud 2021.

Sa panahon nga makahukom na silang mobalik, giklaro sa opisyal nga kinahanglan nga mopailawom sila sa mga sumbanan nga subling mo-aplay sa ilang operasyon.

Gitug-an niya nga mas daghan unta ang manira, apan wala madugay, ubang mga tulunghaan nakahukom nga mopadayon sa ilang operasyon ug mohimo na lang og pipila ka mga pagpasigo sa ilang galastuhan.

Kahinumdoman nga si Konsehala Pilar Braga, kinsa nangulo sa komite sa edukasyon, niduso bag-ohay lang og resolusyon nga nag-awhag sa nasyonal nga gobyerno nga hatagan og tabang pinansiyal ang tanang mga magtutudlo sa pribadong tulunghaan sa nasud kinsa grabeng naigo sa epekto sa Covid-19 pandemic.

Gitug-an sa konsehala nga sumala sa Coordinating Council of Private Educational Associations, grupo sa mga pribadong mga tulunghaan sa Pilipinas, daghang mga pribadong eskuwelahan naa na sa "verge of closing down operations" tungod sa pandemya.


VIEW COMMENTS
DISCLAIMER:

SunStar website welcomes friendly debate, but comments posted on this site do not necessarily reflect the views of the SunStar management and its affiliates. SunStar reserves the right to delete, reproduce or modify comments posted here without notice. Posts that are inappropriate will automatically be deleted.


Forum rules:

Do not use obscenity. Some words have been banned. Stick to the topic. Do not veer away from the discussion. Be coherent. Do not shout or use CAPITAL LETTERS!

sunstar.com.ph