SUGOD Agusto 3, hingpit nang ipatuman sa Land Transportation Office (LTO) kining driving course completion certificates diin kinahanglan kini kuhaon sa mga accredited driving schools.
Subay niini miluwat na og lista ang LTO 7 sa mga accredited nga driving school sa rehiyon aron didto na unya mopaubos sa Theoretical Driving Course ug Practical Driving Course ang mokuha og student permit ug kadtong mga magkuha pa og bag-ong lisensya mapa-professional o non-professional.
Accredited na sa LTO 7 ang mga driving schools sa TL Mabuhay Driving Lesson Academy Inc. sa Maguikay, Mandaue; Lawaan 1, Talisay City; Pusok, Lapu-Lapu; Villadolid, Carcar City; S. Osmeña, Toledo City; Taytay, Danao City; Lamac, Consolacion; Poblacion, Medellin; isla sa Camotes; Pahina Central, Cebu City; Balamban; Sta. Fe; Mambaling, Cebu City; ug ang AZ888 Driving School sa Vallodolid, Carcar City; Bakilid, Mandaue City; Pajo, Lapu-Lapu City; ug Mambaling, Cebu City.
Samtang sa Negros Oriental, accredited na usab ang driving school sa TL Mabuhay Driving Lesson Academy Inc. sa Taclobo, Dumaguete City; Talungon, Bais City; ug Bayawan.
Samtang sa Bohol ang TL Mabuhay Driving Lesson Academy Inc. driving school sa Poblacion 3, Tagbilaran City; West Canayaon, Garcia Hernandez, ug Talibon gi-accredit na usab sa LTO 7.
"All LTO sites shall only accept and process Student Permit (SP), New Driver's License (DL), and Additional Restriction Code (RC) applications / transactions with driving course completion certificates issued by LTO-accredited Driving School, their authorized Driving School Instructors / Administrators, and by the LTO-Driver Education Centers (DECs) in LTO Offices, which are electronically transmitted to the LTO-IT System," tipik sa post sa LTO 7 sa ilahang official Facebook Page.
Nasayran nga alang sa mokuha og student permit, kinahanglan kini mopaubos og 15-oras nga Theoretical Driving Course (TDC) isip usa sa mga rekisito.
Sa mga mokuha og bag-o nga driver's license, parehong professional ug non-professional, kinahanglan kining mopauos sa Practical Driving Course (PDC).
Samtang kadtong mga restriction codes, kinahanglan usab sila sa PDC.
Tanang certificates niini gikan sa DEP Training Centers, i-transmit ra diretso sa LTO susama sa pagkuha sa medical ug drug test isip rekisito sa LTO nga ang testing center na ang mosumiter niini diretso sa ahensiya. (HBL)