MPBL mobalhin og tv network

MAKIGHUGPONG si Maharlika Pilipinas Basketball League (MPBL) commissioner Kenneth Duremdes sa nagtukod sa liga nga si Senator Manny Pacquiao karong adlawa aron tukion ang mga lakang nga ilang pagabuhaton sa umaabot.

Lakip sa mga tukion nila ni Duremdes ug Pacquiao mao ang pagpangita og laing TV network gumikan kay wala man nakakuha og bag-ong prankisa ang ABS-CBN alang sa free television.

“Regarding sa new TV network, iyon ang idi-discuss natin. Definitely, we will look for another network. Hindi nabigyan ng franchise ang network natin so wala, malungkot tayo. It’s not in our hands anymore,” pasabot ni Duremdes nga napatik sa www.gmanews.tv.

Ang MPBL wala pa nakahuman sa ilang Lakan Cup season nga nahunong sa semi-finals gumikan sa pagkuyanap sa makalilisang nga coronavirus disease 2019 (Covid-19).

Sa pagkahunong sa mga duwa, parehong ning-abot sa deciding Game 3 ang finals series sa North Divison ug hasta sa South Division.

Nagparang sa North Division mao ang San Juan Knights-Go for Gold ug Makati Super Crunch samtang nag-atbang sa South Division mao ang Davao Occidental Tigers-Cocolife ug Basilan Steel-Jumbo Plastic.

Matod ni Duremdes nga sa dili pa sila mohimo og lakang alang sa pagbalik sa aksyon sa liga, tukion una nila ang kabahin sa pagbalhin og TV network.

“Pag-uusapan muna namin with our CEO and founder Sen. Manny Pacquiao kung ano ang next plan namin regarding sa TV,” batbat ni Duremdes.

Giklaro ni Duremdes nga wala unta sila’y planong mobiya sa ABS-CBN kon nakakuha pa og bag-ong prankisa ang maong network.

Ang partnership deal sa MPBL ug ABS-CBN napupos niadtong Marso, 2020. Asoy ni Duremdes nga kon nakakuha pa og bag-ong prankisa ang ABS-CBN, plano unta nilang mopirma’g bag-ong kontrata kay nakauyon sila sa ilang miaging kasabutan.

Ang mga duwa sa MPBL gipasalida sa S+A channel sa ABS-CBN gikan sa pagkahimugso sa liga niadtong 2018.

Sa sayo nga interbyu, nagkanayon si Duremdes nga adunay posibilidad nga sa sunod na nga tuig makabalik ang liga depende sa hulga sa Covid-19.

Gipasabot ni Duremdes nga kon wala pa’y bakuna nga madiskubrihan batok sa Covid-19, lisod nga mabalik ang kombati sa liga.

Hinuon sa ilang panaghugpong ni Pacquiao, posibleng makahunahuna sila og inisiyatiba aron makabalik bisan wala pa’y bakuna. (ESL)