ANDAM nang moaway pagbalik sa labing unang higayon ang multi-weight world champion nga si Adrien Broner gikan sa iyang kapildihan batok ni Filipino boxing icon Manny Pacquiao niadtong Enero, 2019.
Si Broner, kinsa wala nakatilaw og daog sulod na sab sa tulo ka mga tuig ug tunga, mokampanya og balik sa super lightweight division sa iyaha unyang pagbalik.
Katapusang higayon nga miaway si Broner ning maong timbang niadto pang Hulyo, 2017 diin napilde siya ni Mikey Garcia.
Human niini, misaka si Broner sa welterweight division (147).
Ang mga naa sa listahan ni Broner nga kontrahon alang sa iyang pagbalik mao sila si Jose Ramirez, Viktor Postol, Josh Taylor, ug Regis Prograis.
Ang taho kabahin sa plano ni Broner nga mobalik og away nakakuha dayon og interes gikan sa nagdumala ni Prograis nga si Lou DiBella.
Aduna na’y plano kaniadto nga mag-away sila si Broner ug Prograis apan wala kini nadayon tungod kay wala nagkasinabot sa timbang ang duha ka mga kampo. (ESL)