SILOTAN sa Philippine Basketball Association (PBA) ug sa ilaha mismong mother teams ang mga magduduwa nga makasupak sa quarantine rules sa gobiyerno ning panahon sa pandemya.
Kining maong direktiba gianunsyo sa PBA human sa panaghugpong sa coaches ug managers sa 12 ka miyembrong teams niadtong Biyernes.
Gipasabot ni NLEX Road Warriors coach Yeng Guiao ilaha kining gibuhat gumikan kay prayoridad sa liga ang kaluwasan sa tanang mga nangahilambigit.
Gusto sab sa PBA nga maong ehemplo ngadto sa publiko ang ilang mga magduduwa nga kinahanglang mag-amping gikan sa padayong hulga sa coronavirus disease 2019 (Covid-19).
“If you failed to follow yung mga protocols natin, maliban doon sa paparusahan kayo ng PBA, meron din tayong penalty within our own teams,” matod ni Guiao nga napatik sa PBA.PH.
“Internal yan. Mapaparusahan ka na ng team mo, pati sa PBA mapa-fine ka. So doble yan.”
Gituki kining maong isyu human sa insidente nga naglambigit nila ni Japeth Aguilar sa Brgy. Ginebra Gin Kings ug rookie Adrian Wong sa Rain or Shine Elasto Painters nga parehong nakita sa video nga na-post sa social media nga nagduwa og 5-on-5 basketball diin kauban nila ang ubay-ubay nga amateur players.
Ubos sa General Community Quarantine (GCQ), gidili pa ang mga kalihukan nga makapatapok og daghang mga tawo sama sa 5-on-5 baskeball.
Sila si Aguilar ug Wong parehong gipamulta sa PBA og P20,000, pasubayon og 14 ka mga adlaw nga quarantine ug 30 ka mga oras nga community service.
Hinuon, wala sila siluti sa ilang tagsatagsa ka team.
“Napag-usapan yan at ginawa ngang example yung situation nila Japeth,” pasabot ni Guiao.
“Kung merong evidence na makita or mapatunayang nag five-on-five kayo, you will be fined.”
Nagkanayon si Guiao nga siya mismo, estrikto sa iyang mga magduduwa nga moduwa og 5-on-5 basketball ning panahuna.
“Mahigpit na mahigpit sa ngayon ang paglalaro ng five-on five kasi we will still be breaking the regulations of the IATF with regards sa social distancing,” batbat ni Guiao.
“Kaya nga ginawa lang na apat (na players) tsaka isang coach at isang health officer kasi bawal nga ang five-on-five.”
Giklaro ni Guiao nga bug-at nga silot ang ilang ipahamtang ngadto sa makasupak sa quarantine rules.
“I think this is also a deterrent para yung mga players natin and personnel will be very cautious and aware of these protocols,” pasabot ni Guiao.
Sa laing bahin, nagplano ang PBA nga mosumiter og laing hangyo ngadto sa Inter-Agency Task Force (IATF) nga tugtan na ang ilang teams nga makapraktis og 5-on-5 basketball karong Agusto, 2020.
Gikompirmar ni Commissioner Willie Marcial kining maong plano.
“May protocol na ako pero nagre-research pa ako. Kukunsulta pa tayo sa mga doktor para kapag sinubmit ko uli sa Task Force, baka ma-level up na to scrimmages. Naghahanda na kami. Baka first week of August, bigay ko na uli sa Task Force,” matod ni Marcial.
Nidugang si Marcial nga posibleng sun-on nila ang gisubay nga health protocols sa National Basketball Association (NBA) kabahin sa pagbalik sa aksyon sa liga sugod karong Hulyo 30, 2020 sa Walt Disney World Resort sa Orlando, Florida. / ESL