USA ka drayber sa traysikol nga giingong gimingaw sa asawa ug mga anak nagsunog sa kaugalingon uban sa iyang panimalay kagahapon, Hulyo 12, sa alas 2:00 sa kaadlawon sa Barangay Looc, lungsod sa Santander.
Si Emelio Diaz Magalso, 75, minyo, ug drayber sa traysikad sa naasoy nga lungsod, ang napaig uban sa iyang panimalay dihang naabtan sa kapulisan ug mga bombero.
Si Police Staff Sgt. Wilfredo Ybañez sa Santander Police Station nga nahinabi sa Superbalita Cebu nagkanayon nga dunay gihambing ang biktima nga sakit.
Giingong nag-inusara nalang kini sa ilang panimalay kay ang asawa usa ka overseas Filipino worker (OFW) samtang tua sa kaulohan iyang anak.
Matod sa pulis, nabulabog ang pagkatulog sa mga silingan human niulbo ang panimalay sa biktima ug wala gayud kini makagawas samtang mikaon sab ang maong sunog sa laing duha ka panimalay sa silingan.
Nagtuo sila sa kapulisan ug bombero nga arson ang nahitabo. Kini tungod kay ikaduha na niyang higayon nga mikutlo sa iyang kinabuhi.
Matod ni Ybañez, nga ang sulti sa mga silingan nga nisuway na usab kini sa pagkamatay pinaagi sa pagdaob sa iyang traysikol apan napakgang.
Si FO1Joseph Yongco, bombero sa lungsod sa Oslob nga nahinabi sa Superbalita Cebu, niingon nga dihang nanawag nila ang Santander Police Station, ilaha dayong giisa sa 2nd alarm ang sunod diin nangayo sab silag abag sa mga bombero sa silingang lungsod sanglit tulo naman ka panimalay ang gikaon.
Sa pag-abot nila sa lugar sa pagkumbati sa sunog ug sa pagkapawong sa kayo, ilahang nakita ang patay’ng lawas sa biktima diha sa lawak niini.
Ang lawas nga naghayang sa kwarto diha sa iyang atubangan ang 2 ka tangke sa LPG.
Hinungdan nga nagtuo sila nga nagpakamatay ang biktima didito sa lawak niini dala ang duha ka tangke sa LPG ug posibling didto niya giduslitan.
Hinuon palawman pa nila ang imbestigasyon apan sa pagkakaron kini maoy ilang gisubay.
“Nanamilit man gud ni siya Sir pagka-Sabado sa buntag, gipanghatag niya sa mga piniling higala ang iyang mga butang, rice cooker, biseklita ug uban pa, mipadayag daw nga ako ning ipanghatag kay basin unya dunay mahitabo nako, nagbilin sab og numero nga pamilya nga matawgan,” dugang ni FOI Yongco.
Ang mga higala niini mikumedya pa nga kon pwedi ibilin sab iyang traysikol, mitubag ang biktima nga iyahang dalhon sa iyang kamatayon.
Nahibaw-an nila nga nag-antos sab diay kini sa sakit nga goiter ug hubak.
Tungod sa mga gihatag nga impormasyon sa mga higala ug silingan nga daw nanamilit ang biktima, nagtuo ang bombero nga nag-suicide kini pinaagi sa pagsunog sa kaugalingon.
Ang iyang kusina sa panimalay layo sab og distansiya unya ang LPG naa na sa iyang lawak tupad sa iyang lawas.
Ang panimalay ginama lang sa mixed materials, samtang ang sunog gibanabana nila nga midanyos og P40 mil. /