Editoryal: Tungod sa Covid-19

ANG coronavirus disease 2019 (Covid-19) nakapapaspas sa paglatid sa digitalization sa nasod. Daghang kompaniya nipatuman sa work at home panahon sa lockdown o ang disinfection sa mga buhatan. Pinaagi sa maayong connectivity sa internet, napamatud-an nga malampuson ang pagtrabaho nga naa lang sa balay nga usa lang unta ka damgo.

Ug bisan dili hingpit nga andam, ang kagamhanan buot nang mopatuman sa online classes atol sa pag-abli sa giuswag nga laing tuig tingklase karong Agusto 24, 2020. Dili kaha magkayamukat ang agi? Hinuon, bentaha nga napugos sa pagsugod sa digital education. Pwede kini makorehian ug mapalambo sa dagan sa panahon labi na ang unod sa leksiyon.

Tungod sa Covid-19, mas naklaro ang walay pulos nga opisyal sa lokal nga kagamhanan, kurakot ug huyang nga mas daghang gamhanan sa iyang palibot. Dili makapanaug og igong hukom, apan ang pagkonsulta una sa uban diin usa sa mga rason sa panagsungi sa pamahayag o pagpahibalo sa usa ka polisiya o lagda sa lockdown.

Tungod sa kabalaka sa pagkaylap sa virus, ang katawhan daling nakakat-on sa protocol sa panglawas sama sa pagpanghugas kanunay, pagsunod sa social distancing, pagsul-ob og face mask labi na kon molakaw ug uban pa. Lakip sa pagsagop sa pagpalig-on sa immune system aron dili mataptan sa virus o mawala lang human sa 14 ka adlaw nga incubation period nga walay nadaut nga mahitabo sa indibiduwal. Daghang walay trabaho dili lang sa lokal nga kahimtang, lukop sa tibuok kalibotan. Tungod sa lockdown, daghang negosyo ang misira o nanaktak og trabahante aron makasugakod sa alkanse nga operasyon. Apan ang diskarte sa uban makabilib human nidangop usab sa online sa paghimo og bisan unsang negosyo labi na sa pagkaon aron makakwarta.

Ang Covid-19 hinungdan usab sa hinayhinay nga pagtumaw ug paglatid sa bag-ong normal aron mopadayon sa pagkabuhi uban sa hulga sa virus, sama sa ubang sakit nga manakod. Dili kita mahadlok apan magmabinantayon kanunay.

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph