SUPERBALITA CEBU

Nadela: Gikahimut-an ka sa Ginuo

Asoy Ni

PADAYON ang mga pangaliya nga matapos na kining krisis sa panglawas nga naghulga kanato adlaw ug gabii. Sa samang higayon, kita dinhi sa Sugbo nagpadayon sa atong nasugdan nga pangamuyo sa Labaw’ng Makagagahum alang sa katumanan sa atong pangandoy nga makabaton og ikaduhang santos nga mao si Msgr. Teofilo Camomot. Di na maihap ang mga testimoniya sa iyang pagka balaan.

Mga masakiton nga nidangop kaniya nangaayo. Mga tawo nga nangandoy nga makab-ot ang ilang mga damgo sa kinabuhi iyang gihatagan og katuman. Gisulbad ang mga dagkong problema nga naghamok sa ilang inadlaw nga pagpuyo. Gitul-id ang gubot nga kinabuhi ug daghan pa. Kana pinaagi sa tabang ni Msgr. Camomot.

Usa sa mga sugilanon nga may labot ang pagka milagroso ni Msgr. Camomot akong nautingkayan sa mga post sa Facebook sa niagi lang adlaw. Ang akong higala nga si Joseph Tan Kong sa Carcar City, nag-post sa usa ka awit nga gikanta mismo sa iyang hamiling kapikas. May caption kini nga naghisgut og pagkakaplag nga wa damha sa maong awit nga gitagik ug gikanta niadtong batan-on pa ang iyang asawa nga ikaduha sa unom ka managsuon nga gibuhi sa amahan nga usa ka security guard.

Giulohan kini og Gikahimut-an ka sa Ginuo. Kining maong awit mabati bisan asa sa nakalabayng katuigan isip pahinungod kang Msgr. Camomot. Sa matag Santos nga Misa sa simbahan ni Msgr. Camomot sa siyudad sa Carcar, mao ni kantahon matag kalawat.

Sa akong interview sa nag-compose ug nag-awit sa talagsaon nga sonata, nga si Primrose Pacenio Kong ang asawa ni Boss Joseph, iyang gitug-an nga tungod sa simpleng kinabuhi ug talagsaong pangalagad ni Msgr. Camomot niadtong buhi pa siya, nagsilbing inspirasyon nganong natawo ang maong awit.

Tuig 2010 sa dihang niundang siya sa pag-eskwela sa college ug pag-awit sa mga hotel kauban ang iyang banda, nakahukom si Primrose nga mosulod sa pagka madre. Tuod man, nahimo siyang aspirant sa Daughters of St. Theresa nga nahimutang sa Carcar City. Tinguha man niya nga mahimong madre, apan ang kahigayonan wa motugut mao nga nigawas siya og nibalik sa pagkanta sa usa ka hotel aron kasustinihan ang iyang pagbalik pag-eskwela sa college.

Apan sa wa pa ni mahitabo, naporma na ang iyang composition gani nakuhaan kini og video samtang iyaha kining giawit kauban ni musikero Jonas Tangarorang. Na-upload ang maong video, napasa pasa hangtod nga wa na igkita. Hinuon pinaagi kang Fr. Dennis Baricuatro nga usa sab ka musician, mas napalambo pa ang maong composition nga si Primrose gihapon ang nag-awit.

Kini maoy gigamit isip music video sa daghang kalihukan ni Msgr. Camomot nga nikatap sa social media. Napulo na nakatuig ang nakalabay sukad nga kini gihan-ay ug giawit ni Primrose sa panahon sa iyang kabatan-on kinsa nahigugma sa mga mithi ug pagtulun-an ni Msgr. Camomot. Karon si Primrose naminyo niadtong 2018 sa nailang bus operator sa habagatang Sugbo nga si Joseph Kong.

Nangandam na sab siya para sa sunod nga Bar Exams human niya makuha ang ikaduhang diploma sa abogasiya sa University of San Jose-Recoletos. Una niyang gitapos ang kursong Bachelor of Arts in Liberal Arts & Commerce isip Cum Laude. Alang sa magtiayong Joseph ug Primrose, ang naugkat nga video sa awit-pahinungod kang Msgr. Camomot, usa ka milagro nga nahitabo ning panahon sa pandemya.


VIEW COMMENTS
DISCLAIMER:

SunStar website welcomes friendly debate, but comments posted on this site do not necessarily reflect the views of the SunStar management and its affiliates. SunStar reserves the right to delete, reproduce or modify comments posted here without notice. Posts that are inappropriate will automatically be deleted.


Forum rules:

Do not use obscenity. Some words have been banned. Stick to the topic. Do not veer away from the discussion. Be coherent. Do not shout or use CAPITAL LETTERS!

sunstar.com.ph